Presidenti serb, Aleksandar Vuçiq, ka njoftuar sot se ka mbërritur në Davos, ku do të marrë pjesë në Takimin Vjetor të Forumit Ekonomik Botëror.
Vuçiq ka shkruar në Instagram se, edhe pse beson se viti 2024 do të jetë veçanërisht i vështirë për të gjithë botën, Serbia “me shumë shpresë dhe entuziazëm” po hyn në realizimin e “ëndrrave dhe planeve të mëdha”.
“Do të flas për to në ditët në vijim me liderë, investitorë dhe biznesmenë të shumtë”, tha presidenti i Serbisë, së bashku me një video që tregon udhëtimin e tij me një helikopter të ushtrisë zvicerane në një qendër popullore skijimi dhe konferencash në Alpe.
Gjatë qëndrimit në Davos, Vuçiq do të marrë pjesë në seancën e Dialogut Diplomatik me temën e Ballkanit Perëndimor, si dhe do të marrë pjesë në panelet “Rikthimi i besimit në sistemin global dhe ndërtimi i Evropës së së ardhmes”.
Mbrëmë në Davos filloi takimi i 54-të vjetor i Forumit Ekonomik Botëror (WEF), ku do të mblidhen figura të shumta publike, krerë shtetesh apo qeverish, kompani partnere të Forumit, ekspertë kryesorë dhe përfaqësues të shoqërisë civile.
