Ministri serb i Ndërtimit, Transportit dhe Infrastrukturës Goran Vesiq njoftoi se nesër me kolegu i tij nga Maqedonia e Veriut Bllagoj Boçvarski do të nënshkruajnë Memorandum për ndërtimin e hekurudhës së shpejtë nga Nishi në Shkup, për të cilën të dyja vendet do të kërkojnë bashkërisht mjete nga BE, njoftoi Radio Televizioni i Vojvodinës, transmeton Portalb.mk.
“Do të nënshkruajmë memorandum me Maqedoninë dhe për këtë jam veçanërisht krenar”, theksoi Vesiq.
Ai tha se projektimi i seksionit Nish – Preshevë, 135 kilometra i gjatë, është në proces dhe partnerët nga Maqedonia do të projektojnë 50 kilometrat e tyre nga kufiri deri në Shkup.
Kujtojmë se pesë e rekomandimeve kryesore të Komisionit Evropian (KE) në kapitujt për transportin dhe korridoret trans-evropiane në Raportin e fundit për vitin 2023 për progresin e Maqedonisë së Veriut në rrugën e saj drejt integrimeve evropiane ishte edhe përshpejtimi urgjent i ndërtimit të Korridorit 8 hekurudhor, me theks të veçantë te shpallja e tenderit për ndërtimin e fazës së tretë të hekurudhës drejt Bullgarisë, në shtrirjen nga Kriva Pallanka deri në kufirin maqedono-bullgar.
Në Raport thuhet se përgatitjet për shpalljen e dokumentacionit të tenderit për fazën e tretë të ndërtimit të hekurudhës drejt Bullgarisë po vonojnë dukshëm. Njëkohësisht, Komisioni Evropian thekson se ndërtimi i hekurudhës nga Kumanova në Kriva Pallankë ka filluar në nëntor të vitit 2022 me dy kontraktorë të rinj. Megjithatë, nga KE-ja konstatojnë se:
“Nevojiten përpjekje të mëtejshme dhe urgjente për ta përshpejtuar progresin në Korridorin hekurudhor 8 dhe pjesëve të tjera prioritare të rrjetit hekurudhor dhe rrugor”.
