Sindikatat e Serbisë do të bashkohen për herë të parë me një protestë të thirrur të enjten nga udhëheqësit studentorë, gjashtë muaj pas tragjedisë vdekjeprurëse në stacionin e trenit që shkaktoi demonstrata masive kundër korrupsionit.
Serbia është përfshirë nga një valë trazirash që kur 16 persona u vranë në shembjen e stacionit hekurudhor të rinovuar rishtazi në Novi Sad nëntorin e kaluar, një tragjedi që fajësohet gjerësisht për korrupsionin dhe mbikëqyrjen e dobët.
Kjo tashmë ka çuar në dorëheqjen e kryeministrit dhe rënien e qeverisë.
Por më 1 maj, studentët dhe anëtarët e pesë sindikatave më të mëdha do të mblidhen para ndërtesës së qeverisë serbe në kryeqytet, Beograd.
Studentët njoftuan në llogarinë e tyre zyrtare në “Instagram” se lufta e tyre hyn në një fazë të re.
Në Serbi, rreth 500,000 njerëz në fuqinë punëtore prej 2.36 milionësh të vendit janë anëtarë të sindikatave, sipas vlerësimeve të vetë sindikatave. Këto pesë sindikata, të cilat mbulojnë shumicën e sektorëve të industrisë, përbëjnë pjesën më të madhe të kësaj anëtarësie.
Studentët thanë se pas protestës, ata nuk do të kufizohen më në bllokadat që i kanë mbajtur fakultetet e tyre të mbyllura për muaj të tërë./
