Franca, së bashku me Belgjikën, Monakon, Luksemburgun, Maltën dhe Andorrën, e njohën zyrtarisht shtetin palestinez në Kombet e Bashkuara të hënën – një hap që e thellon izolimin ndërkombëtar të Izraelit, ndërsa ky i fundit ndjek objektivat e tij maksimaliste ushtarake në Gaza dhe zgjeron vendbanimet në Bregun Perëndimor të pushtuar.
Monako, Malta dhe Luksemburgu shpallën mbështetjen e tyre gjatë samitit për zgjidhjen me dy shtete në Nju Jork, nën bashkëkryesinë e Francës dhe Arabisë Saudite. Belgjika gjithashtu e shpalli njohjen, por theksoi se ajo mund të hyjë në fuqi ligjërisht vetëm nëse Hamasi largohet dhe pengjet lirohen.
Duke folur në samit, presidenti francez Emmanuel Macron tha para Asamblesë së Përgjithshme të OKB-së se njohja e shtetit palestinez është i vetmi opsion që i jep Izraelit mundësinë të jetojë në paqe, duke e quajtur këtë hap një humbje për Hamasin.
“Duhet të bëjmë gjithçka që është në fuqinë tonë për të ruajtur mundësinë e zgjidhjes me dy shtete, ku Izraeli dhe Palestina të jetojnë krah për krah në paqe dhe siguri”, deklaroi Macron.
“Njohja e të drejtave të popullit palestinez nuk ia mohon asgjë të drejtave të popullit të Izraelit, të cilin Franca e ka mbështetur që nga dita e parë”, shtoi ai.
Sekretari i Përgjithshëm i OKB-së, Antonio Guterres, e quajti situatën në Gaza “të padurueshme” dhe tha se zgjidhja me dy shtete është rruga e vetme për t’i dhënë fund këtij makthi. Ai theksoi se shtetësia për palestinezët është e drejtë, jo shpërblim, dhe pa të nuk do të ketë paqe në rajon.
Ky hap i Francës erdhi pasi Mbretëria e Bashkuar, Kanadaja, Australia dhe Portugalia shpallën njohjen gjatë fundjavës, duke iu bashkuar mbi 145 shteteve anëtare të OKB-së që tashmë e njohin Palestinën. Megjithatë, ky vendim mbetet kryesisht simbolik pa mbështetjen e SHBA-së, e cila ka të drejtën e vetos për anëtarësim dhe nuk mori pjesë në samit.
Samiti kishte për qëllim të intensifikonte përpjekjet për ringjalljen e zgjidhjes me dy shtete dhe sigurimin e një rruge drejt paqes. Por pas gati dy vitesh gjakderdhje në Gaza dhe zgjerimit të pozicioneve izraelite në Bregun Perëndimor, frika po rritet se shtetësia palestineze po bëhet një perspektivë gjithnjë e më e largët.
Ky vendim nxiti reagime të ashpra nga Izraeli. Ambasadori izraelit në OKB, Danny Danon, tha se SHBA dhe Izraeli nuk do të marrin pjesë në këtë “sharadë” dhe shprehu zhgënjimin e tij ndaj Macronit.
“Më 8 tetor ju qëndruat përkrah Izraelit, folët për pengjet. Sot ju vazhdoni përpara duke i lënë pengjet pas jush”, tha Danon duke iu referuar shteteve që planifikojnë ta njohin Palestinën.
Kryeministri izraelit Benjamin Netanyahu, në mbledhjen e qeverisë të së dielës, deklaroi se Izraeli do të luftojë në OKB dhe në forume të tjera ndërkombëtare kundër propagandës shpifëse të drejtuar ndaj tyre dhe kundër thirrjeve për krijimin e një shteti palestinez, për të cilin tha se rrezikon ekzistencën e Izraelit dhe përfaqëson një shpërblim absurd për terrorizmin.
