Strugë, tetor 2025 – Qendra për Hulumtime dhe Komunikim Politik – CRPC ka realizuar një anketë me qytetarët e Komunës së Strugës, në prag të zgjedhjeve lokale të 19 tetorit 2025. Rezultatet e hulumtimit tregojnë një orientim të qartë të opinionit publik drejt Mendi Qyrës, kandidatit të pavarur, i cili aktualisht gëzon mbështetjen më të madhe qytetare në komunë.
Sipas të dhënave të anketës, Mendi Qyra prin me 41,7% të përkrahjes, duke lënë pas kandidatët partiakë si Arsim Dalipi (AKI) me 35,2% dhe Jovana Mojsoska (Levica) me 3,7%. Kjo epërsi tregon një ndryshim të dukshëm në frymën elektorale të qytetarëve, të cilët po i drejtohen gjithnjë e më shumë alternativave të pavarura dhe jo strukturave tradicionale partiake.
Në pyetjen se si e vlerësojnë qeverisjen lokale gjatë mandatit të kaluar, 55,7% e të anketuarve janë shprehur se administrata komunale ka punuar “dobët” ose “shumë dobët”, ndërsa vetëm 32,6% e vlerësojnë pozitivisht. Ky rezultat përforcon bindjen se qytetarët e Strugës kërkojnë ndryshim dhe qeverisje të re, më transparente dhe më afër njerëzve.
Problemi më i madh që përmendet nga qytetarët është mungesa e ujit të pijshëm dhe kanalizimeve (35,5%), pasuar nga mirëmbajtja dhe pastërtia (24,8%), infrastruktura rrugore (18,7%), korrupsioni (17,1%) dhe ndriçimi publik (3,9%).
Në pyetjen nëse komuna ka nevojë për ndryshim qeverisjeje, 55,2% e qytetarëve janë përgjigjur “po, patjetër”. Ky qëndrim i gjerë pro-ndryshimit përkon plotësisht me mbështetjen e lartë që gëzon Mendi Qyra, duke e pozicionuar atë si simbol të qeverisjes së ndershme, profesionale dhe qytetare.
“Qytetarët duan njerëz të rinj në politikë, me ide të pastra dhe përkushtim real për qytetin. Mendi Qyra përfaqëson pikërisht këtë frymë,” – theksohet në analizën përfundimtare të raportit të CRPC.
Sipas ekspertëve të komunikimit politik, epërsia e Qyrës në këtë fazë të fushatës është tregues i besueshmërisë dhe afërsisë së tij me qytetarët, duke reflektuar lodhjen e publikut nga politikat e vjetra dhe mungesa e rezultateve konkrete në terren.
🗳️ Anketa e CRPC është realizuar në periudhën 11–13 tetor 2025, me 395 të anketuar, përzgjedhur me metodën “sy më sy” në terren, me një marzh gabimi ±3,5%.
