Skoda Superb ka vendosur një rekord të jashtëzakonshëm për shpenzime të ulëta të motorit diesel, duke kaluar 2,831 kilometra (1,759 milje) pa ndaluar për karburant, përcjell TV21. Miko Marczyk, fituesi i Kampionatit Evropian të Rallit 2025, voziti modelin standard të markës, përveç disa modifikimeve të vogla për aerodinamikë dhe goma me rezistencë të ulët, dhe arriti një konsum mesatar prej vetëm 2.61 litra për 100 km (90.1 mpg).
Udhëtimi i tij përfshiu një rrugë nga Łódź në Poloni, përmes Gjermanisë dhe Parisit, me kthim përmes Holandës, Belgjikës dhe Gjermanisë, duke ruajtur një shpejtësi mesatare prej 80 km/h (50 mph). Gjatë një segmenti 200 km në Francë, makina shpenzoi vetëm 2.2 litra për 100 km (106.9 mpg).
Pavarësisht suksesit, Marczyk synon të arrijë një tjetër rekord: të mbulojë 3,000 km (1,864 milje) me një rezervuar. Ai beson se përdorimi i naftës premium mund të ndihmojë për këtë arritje.
Vetura Superb ishte me tërheqje të rrotave të përparme dhe kuti shtatë-shpejtësish, marsh automatik. Kishte 20,000 km në odometër para se të nisë udhëtimin rekord. Motori 2.0 TDI me 148 kuaj fuqi dhe 360 Nm çift rrotullues nuk u shfrytëzua plotësisht. Një makinë shërbimi udhëtoi para tij për të dhënë informacione mbi trafikun dhe për të ndihmuar në frenim dhe përshpejtim të rregullt.
Megjithatë, motori diesel po humbet terren në Evropë. Shitjet e makinave me naftë kanë rënë në vetëm 8.3% të tregut të makinave të reja, dhe Volkswagen, kompania amë e Skodës, po i largon gradualisht diesel-at nga modelet më të vogla, duke i lënë vetëm në Golf, Octavia dhe modelet më të mëdha. Nëse BE zbaton ndalimin e planifikuar për vitin 2035, motori me djegie të brendshme mund të zhduket nga tregu i makinave të reja në Evropë.
