Kanë kaluar pesë vjet që kur u nda nga jeta Ejup N. Demiri – Puçi, një ndër figurat më të respektuara të Pallaticës, njeri i punës, i fjalës dhe i përkushtimit ndaj bashkëvendasve.
I lindur në një familje me tradita dhe vlera të forta njerëzore, ai trashëgoi nga babai i tij, haxhi Nazifi, ndershmërinë, urtësinë dhe respektin për njerëzit. Gjatë jetës së tij punoi me përkushtim, brenda dhe jashtë vendit, por zemra e tij mbeti gjithmonë pranë vendlindjes, familjes dhe bashkëfshatarëve.
Ejupi ishte ndër ata njerëz që nuk kursenin as kohën e as mundin kur bëhej fjalë për të mirën e përbashkët. Ai dha kontribut të çmuar në shumë iniciativa për zhvillimin e fshatit dhe ishte mbështetës i palëkundur i kauzave kombëtare e arsimore, veçanërisht në periudhën e vetëfinancimit të Universitetit të Tetovës.
Si besimtar i devotshëm, ai e jetoi jetën me dinjitet, respekt dhe dashuri për njerëzit. Ajo që e dallonte më së shumti ishte energjia e tij pozitive. Në gëzime sillte hare, ndërsa në vështirësi sillte ngushëllim dhe forcë. Buzëqeshja, modestia dhe gatishmëria për të ndihmuar të tjerët mbetën tiparet e tij më të spikatura.
Edhe pse u largua fizikisht në vitin 2021, kujtimi për të vazhdon të jetojë te familja, miqtë, shokët dhe të gjithë ata që patën fatin ta njohin. Njerëzit e tillë nuk maten me vitet që jetuan, por me gjurmët që lanë pas.
Pesë vjet më pas, emri i Ejup Demirit – Puçit mbetet i lidhur me mirësinë, fisnikërinë dhe dashurinë për njerëzit.
Prehu në paqe, mik i nderuar. Kujtimi yt do të mbetet i përjetshëm.
Qenan Aliu
