Pas një procedure paraprake hetimore të zhvilluar nga hetuesit e Qendrës Hetimore pranë Prokurorisë Themelore Publike për Ndjekjen e Krimit të Organizuar dhe Korrupsionit, sot, nën drejtimin e një prokurori publik, Policia Financiare, Drejtoria e Inteligjencës Financiare dhe Ministria e Punëve të Brendshme realizuan një aksion të koordinuar ku janë përfshirë disa persona fizikë dhe juridikë. Në aksion janë arrestuar 12 persona, ndërsa 5 persona janë të paarritshëm për organet e ndjekjes.
Hetimi përfshin dy ish-kryetarë të Federata e Futbollit e Maqedonisë (FFM), për të cilët ekziston dyshimi i bazuar se kanë kryer veprën penale “Shpërdorim në detyrë”, shefen e sektorit të financave dhe kontabilitetit në FFM, 14 menaxherë, pronarë dhe persona të autorizuar të kompanive private, si dhe shefin e Departamentit të Gjyqtarëve në FFM. Për disa prej tyre, përveç shpërdorimit në detyrë, ngarkohet edhe vepra penale “Pastrimi i parave dhe të ardhurave të tjera nga vepra penale”.
Sipas hetimeve:
* Ish-kryetari i parë i FFM-së, në periudhën 1 janar 2015 – 25 korrik 2018, së bashku me shefen e financave, dyshohet se kanë përvetësuar 127.451.156 denarë.
* Ish-kryetari i dytë i FFM-së, në periudhën 25 korrik 2018 – 10 tetor 2019, dyshohet se ka përvetësuar 53.351.209 denarë.
* Dëmi i përgjithshëm ndaj FFM-së vlerësohet në 180.802.365 denarë.
Shefja e financave dyshohet se ka manipuluar evidencat kontabël për të fshehur pagesat e paligjshme ndaj kompanive të ndryshme, duke ndryshuar regjistrimet financiare dhe duke fshehur dokumentacionin real të pagesave.
Dy ish-kryetarët e FFM-së kanë nënshkruar gjithsej 728 urdhërpagesa, duke lejuar pagesa pa dokumentacion të plotë dhe pa verifikim të ligjshmërisë së tyre.
Po ashtu, kompanitë e përfshira dyshohet se kanë lëshuar fatura me përmbajtje të rreme për shërbime dhe mallra që nuk janë kryer ose dorëzuar, ndërsa paratë e përfituara më pas janë përdorur në qarkullimin financiar për të fshehur origjinën e tyre të paligjshme.
Prokurori do të kërkojë:
* Masë paraburgimi për 10 persona.
* Masa të tjera sigurie për 7 persona.
* I dyshuari i dytë tashmë ndodhet në paraburgim në një procedurë tjetër.
Sipas shumicës së mediave në Maqedoninë e Veriut, dy ish-kryetarët e FFM-së që përmenden në këtë rast janë Ilço Gjorgjioski dhe Muamed Sejdini, megjithëse në komunikatën e prokurorisë emrat nuk janë përmendur zyrtarisht.
