Policët e Sektorit për Punë të Brendshme Tetovë – Njësia Operative Gostivar gjatë natës kryen kontrolle aksionale në dy objekte turistike në zonën e Gostivarit.
Kontrolli u krye më 30 korrik, në periudhën nga ora 02:00 deri në 04:00. Në një objekt turistik në fshatin Çegrane, zona e Gostivarit, rreth orës 02:00 u privua nga liria M.H. (50 vjeç) nga fshati Forino.
Sipas policisë, pasi vuri re policët para objektit, ai e mbylli derën e hyrjes dhe i paralajmëroi të pranishmit që të iknin. Megjithatë, me reagim të shpejtë të policëve, te dalja e pasme u pengua arratisja e disa grave – shtetase të huaja.
Në një objekt tjetër turistik në zonën e Njësisë Policore Galate, u arrestua A.A. (53 vjeç) nga Gostivari, pasi te ai u gjet marihuanë.
Gjatë kontrolleve në të dy objektet, për shkak të keqpërdorimit të qëndrimit turistik, domethënë qëndrimit në kundërshtim me qëllimin e deklaruar, u arrestuan gjithsej 15 shtetase të huaja të moshës nga 19 deri në 40 vjeç.
Prej tyre, 11 u gjetën në objektin në fshatin Çegrane, ndërsa katër në objektin në zonën e Njësisë Policore Galate. Bëhet fjalë për shtetase nga Serbia, Shqipëria dhe Kolumbia.
Të gjitha janë mbajtur në stacionin e policisë dhe pas dokumentimit të plotë të rastit do të ndiqen procedurat përkatëse.
