Një pjesë e pikave të karburantit në Shkup kanë ndërprerë shitjen e naftës, në prag të shtrenjtimit të ri që hyn në fuqi nga mesnata.
Komisioni Rregullator për Energjetikë (KRRE) vendosi që nga 18 gushti, në orën 00:01, çmimi i naftës të rritet për 6,50 denarë dhe të arrijë në maksimum 98 denarë për litër.
Benzina „Eurosuper BS-95“ do të shitet me çmim deri në 91,50 denarë, ndërsa „BS-98“ deri në 93,50 denarë për litër.
Vendimi i KRRE-së parashikon një rritje mesatare të çmimeve me pakicë të derivateve të naftës prej 4,85 për qind, si pasojë e rritjes së çmimeve referente të derivateve në tregun botëror.
Nga KRRE sqarojnë se çmimet e përcaktuara janë çmime maksimale, që do të thotë se pikat e karburantit mund ta shesin karburantin edhe me çmime më të ulëta.
