Në nëntor 2023, me buzëqeshjen vesh më vesh dhe me sytë plot shkëlqim nga përqafimet e Melonit, Edi Rama firmosi një marrëveshje për ndërtimin e një qendre në Shqipëri ku do strehoheshin deri në 3 mijë emigrantë afrikanë burra, por secili nuk do të qëndronte më shumë se 30 ditë. Atëherë e quajtën një marrëveshje për “bashkëpunim strategjik”.
Sot? Qendra në Gjadër është transformuar në një Qendër të Përkohshme të Riatdhesimit, ka ndryshuar krejtësisht funksionin dhe është shndërruar në një Cpr të mirëfilltë italiane, ku refugjatët do të mbahen deri në 18 muaj.
Vendimi u mor këtë të premte pasdite në një mbledhje të qeverisë italiane. Ndryshimi i protokollit të nëntorit Rama-Meloni për refugjatët, u bë në mënyrë të njëanshme, me dekret të Melonit.
Rama? Asnjë fjalë. Asnjë status. Asnjë shpjegim për qytetarët shqiptarë. Ndryshimin e protokollit me Shqipërinë e sqaroi ministri italian i Brendshëm Matteo Piantedosi, pas mbledhjes së Këshillit të Ministrave, u shpreh qartazi: “Ndërhyjmë mbi ligjin e ratifikimit të protokollit me Shqipërinë, duke lejuar përdorimin e strukturës ekzistuese për personat në pritje dëbimi.”
Pra, qeveria italiane ka ndryshuar marrëveshjen me një dekret, pa e pyetur fare palën shqiptare.
Piantedosi vazhdoi duke shpjeguar se CPR në Gjadër do të funksionojë si të gjitha qendrat e tjera në Itali.
“Qendra në Gjader nuk është zëvendësuese por shtesë e rrjetit të Cpr-ve italiane. Dhe gjithçka bëhet në mënyrë të ligjshme, pa shtesa buxhetore.” tha ai.
Gjykatat italiane rrëzuan marrëveshjen Rama-Meloni si të paligjshme, ndaj qeveria e ekstremit të djathtë italian vendosi ta kthejë në Cpr të plotë, në mënyrë që të shmangë barrierat ligjore.
Një truk ligjor, por që e trajton Shqipërinë si një protektorat, pa zë në vendimet që merren për të.
Risia? Për herë të parë një vend i huaj merr vendime operative për një pjesë të territorit shqiptar, pa u konsultuar, pa nënshkruar, pa kërkuar dakordësi. Dhe për ironi, për këtë territor vendoset jo për autostrada, jo për investime strategjike, por për internim njerëzish të padëshiruar. Më shumë poshtërim se kaq?
E ndërsa Meloni firmos dekretet për refugjatët, Rama mbetet i vetmi lider europian që ka shitur sovranitetin në këmbim të një një puthjeje të kryeministres së Italisë. Sepse sot, kryeministri nuk e sheh të udhës të pyesë se çfarë ndodhi me protokollin e parë që nënshkroi me Italinë? Përse refugjatët që ishte parashikuar të qëndronin vetëm 28 ditë, tani do të qëndrojnë për 18 muaj në Gjadër? Kush do e menaxhojë qendrën? Çfarë ndodh nëse refugjatët arratisen, siç ka ndodhur në Itali dhe kush do të përgjigjet për këtë nivel të ri sigurie?
Qendra në Gjader, thonë mediat italiane do të zgjerohet, transferimet do të nisin sapo të botohet dekreti në Fletoren italiane, dhe çdo gjë bëhet me charter, sepse sipas italianëve “është njësoj si të ishte pjesë e territorit tonë”.
Lëvizja e qeverisë italiane është e imponuar nga vendimi i gjykatave që rrëzuan paktin mes Melonit dhe Ramës. Për ta përshtatur qendrën, do të duhen më shumë para, që i shtohen shumës prej 1 miliard euro që kishte parashikuar qeveria Meloni.
Vetëm se dikur shqiptarët dyndeshin nëpër Cpr italiane, ndërsa sot, qeveria e tyre i ndërton Cpr për afrikanë, pa e ditur as vetë përse.
Gjadri sot është simbol i turpit të Shqipërisë në arenën ndërkombëtare, i shndërrimit të vendit në një kosh mbetjesh për politikat e dështuara të emigracionit të Europës, një vend internimi për të padëshiruarit, që i jep kombit fytyrën e atij që pranon gjithçka, mjafton t’i thonë “partner i mirë”.