Koalicioni VLEN ka reaguar me kritika ndaj rezultateve të regjistrimit të popullsisë të realizuar në vitin 2021, duke ngritur dyshime për saktësinë e të dhënave dhe duke kërkuar përgjegjësi politike për atë që e cilëson si “proces të komprometuar”.
Në reagimin e publikuar, VLEN thotë se “regjistrimi i vitit 2021 u shit” dhe se “BDI preu në besë shqiptarët”, duke sugjeruar se shifrat e publikuara për disa vendbanime me shumicë shqiptare nuk përkojnë me realitetin në terren. Si shembull, përmenden fshatra si Gërçeci, ku sipas të dhënave zyrtare janë regjistruar vetëm 36 banorë, dhe Reçica, ku rezultojnë 1653 banorë. Sipas VLEN-it, këto shifra nuk janë pasojë e gabimeve teknike, por rezultat i “një pazari të qëllimshëm politik”.
“Ndërkohë që shqiptarët fshiheshin nga statistikat, krerët që kishin përgjegjësinë heshtën,” thuhet në reagim. Po ashtu, VLEN ngre pyetjen nëse regjistrimi është përdorur si instrument për interesa personale, duke aluduar në mundësinë që procesi të jetë ndikuar për të shmangur ndjekjen penale të disa personave të afërt me liderin e BDI-së.
“A e shiti Ali Ahmeti regjistrimin e popullsisë për të shpëtuar dhëndrin dhe nipat nga ndjekja penale për korrupsion? Shqiptarët humbën në numra. Familjarët e tij fituan në tenderë”, thuhet në reagimin e VLEN-it.
Në deklaratë vihet theksi se pasojat e këtij regjistrimi janë të ndjeshme për përfaqësimin dhe të drejtat e shqiptarëve në vend, ndërsa kërkohet që autoritetet të japin sqarime për mënyrën si është zhvilluar procesi dhe se si janë siguruar të dhënat përfundimtare.
Deri më tani, nga ana e BDI-së apo institucioneve përkatëse nuk ka pasur një reagim zyrtar ndaj pretendimeve të ngritura nga VLEN. Çështja mbetet e hapur dhe pritet të jetë temë debati në skenën politike dhe publike të vendit.
