Një shtetas 34-vjeçar nga Mali i Zi është ndaluar nga policia në dalje të Maqedonisë së Veriut, pasi ishte evidentuar për drejtim të pakujdesshëm të automjetit me shpejtësi prej 185 kilometrash në orë.
Sipas informacioneve nga Ministria e Punëve të Brendshme (MPB), ngjarja ka ndodhur më 14 tetor 2026, në orën 14:25, kur zyrtarët policorë kanë kontrolluar një automjet të tipit „BMW“ me targa malazeze, në dalje të shtetit.
Gjatë kontrollit është konstatuar se shoferi, me inicialet M.N. (34), nga Mali i Zi, ishte evidentuar si kryerës i veprës penale sipas nenit 297-a të Kodit Penal, që ka të bëjë me drejtimin e pamatur të automjetit motorik.
Shkelja ishte regjistruar më herët në autostradën Shkup–Pika Kufitare Tabanoc, pranë kryqëzimit të Delladrovceve, ku shoferi po lëvizte me shpejtësi prej 185 km/h.
Shtetasi malazez është shoqëruar në stacion policor, ndërsa nga MPB-ja bëjnë të ditur se pas dokumentimit të plotë të rastit ndaj tij do të parashtrohet kallëzim penal përkatës.
