Vikendin që lamë pas Real Madridi edhe matematikisht e siguroi titullin e La Ligas, që ishte i 36-ti për ta në historinë e klubit.
Kushti i vetëm që kjo të ndodhte ishte që Real Madridi të fitonte ndeshjen ndaj Cadizit, ndërsa Barcelona të humbiste ose të barazontë ndaj Gironës.
Kjo edhe ndodhi pra pasi ‘Los Blancos’ arritën që të shënojnë fitore me rezultat të pastër 3-0 ndaj Cadizit në ‘Santiago Bernabeu’, ndërsa Barcelona pësoi në ‘Montilivi’ me rezultat 4-2 ndaj Gironës.
Duke qenë se vëmendja e lojtarëve tashmë ishte përqendruar tek ndeshja e dytë gjysmëfinale në Ligën e Kampionëve ndaj Bayern Munichut, klubi vendosi që ta shtyjë festën e titullit kampion në La Liga për një datë tjetër.
Federata Spanjolle e Futbollit kishte vendosur që t’ia dorëzojë trofeun madrilenëve në ndeshjen që do ta luajnë këtë vikend ndaj Granadas në udhëtim, por Real Madridi e ka refuzuar këtë.
Sipas hierarkisë së klubit do të ishte një mungesë respekti që lojtarët të festonin titullin para shikuesve të Granadas, duke marrë parasysh faktin se ata po luftojnë për t’i shpëtuar rënies nga elita e futbollit spanjoll.
Kësisoji, raportimet e fundit nga Spanja bëjnë me dije se ‘Los Blancos’ do ta marrin trofeun e tyre në ndeshjen ndaj Alavesit që do të luhet me datë 14 maj në ‘Santiago Bernabeu’.
Përndryshe, ndeshja mes Granadas dhe Real Madridit do të luhet të shtunën me fillim nga ora 18:30 ku për vendasit pritet që nga minuta e parë të luajë sulmuesi shqiptar Myrto Uzuni.
