Ka kaluar një vit nga vrasja e 14-vjeçares Vanja Gjorçevska. Ajo më 27 nëntor të vitit 2023, ishte rrëmbyer para shtëpisë së saj në orën 7:30 të mëngjesit, e më pas dy orë më vonë është vrarë brutalisht në afërsi të fshatit Brazdë. Policia e ka gjetur trupin e saj pak ditë më vonë, më 3 dhjetor. Një vit më vonë, në Gjykatën Penale në Shkup vazhdon gjykimi i pesë personave të akuzuar për rrëmbimin dhe vrasjen e saj – i akuzuari i parë Ljupço Palevski Palço, kryetar i partisë politike Desna, tre bashkëpunëtorët e tij, Velibor Manev, Bore Videvski dhe Vlatko Keshishev, si dhe babai i saj Aleksandar Gjorçevski, i cili akuzohet se ka ndihmuar gjatë rrëmbimit. Vrasësit e akuzuar të krimit brutal mund të përballen me burgim të përjetshëm nëse prokuroria e vërteton krimin, ndërsa Aleksandrit i kanoset burgim një dekadë. /Alsat.mk
