Sipas raportimeve nga Argjentina, ish-sulmuesi po organizon një ndeshje speciale lamtumire, me synimin për të mbledhur disa prej yjeve më të mëdhenj me të cilët ka ndarë fushën gjatë karrierës së tij.
Mes emrave që mund të jenë pjesë e eventit janë Lionel Messi dhe Cristiano Ronaldo. Nëse të dy marrin pjesë, do të ishte një moment historik: dy rivalët më të mëdhenj të futbollit të epokës moderne mund të luajnë për herë të parë në të njëjtin ekip.
Tevez ka luajtur me Messi-n te kombëtarja e Argjentinës, ndërsa me Ronaldo-n ka qenë shok skuadre gjatë periudhës së tij te Manchester United. Pikërisht kjo lidhje me të dy yjet e ka bërë listën e të ftuarve edhe më spektakolare.
Ndeshja pritet të zhvillohet në dhjetor, në “La Bombonera”, stadiumi me rreth 57 mijë vende që për Tevez-in përfaqëson një nga vendet më të rëndësishme të karrierës së tij.
Tevez, tashmë 42 vjeç, u tërhoq nga futbolli në vitin 2021, ndërsa Boca Juniors ishte klubi ku e mbylli karrierën si futbollist.
Nëse Messi dhe Ronaldo vërtet zbresin në fushë së bashku, “La Bombonera” mund të bëhet skena e një prej imazheve më të jashtëzakonshme në historinë e futbollit.
