Kevin de Bruyne ka njoftuar të premten se do të largohet nga Manchester City pas përfundimit të këtij edicioni, kur edhe i skadon kontrata.
Mesfushori 33-vjeçar i ka fituar 16 trofe që kur iu bashkua Cityt nga Wolfsburgu në vitin 2015, përfshirë gjashtë tituj të Premier Leagues dhe Ligën e Kampionëve në vitin 2023.
Ai ka realizuar 106 gola në 413 paraqitje në të gjitha garat për Cityn, por ka qenë titullar në vetëm 19 ndeshje të këtij edicioni.
“Çdo tregim e ka fundin, por kjo ka qenë padyshim kaptina më e mirë”, ka shkruar mesfushori belg në rrjetet sociale.
“Futbolli më udhëhoqi te të gjithë ju – dhe te ky qytet. Ndoqa ëndrrën, pa e ditur se kjo periudhë do të ma ndryshonte jetën. Ky qytet. Ky klub. Këta njerëz më dhanë çdo gjë. Nuk kisha zgjedhje tjetër përveç se t’ua shpaguaja. Dhe qëllojeni – ne fituam çdo gjë. Pavarësisht na pëlqeu apo jo, është koha të themi mirë u pafshim. Suri, Rome, Mason, Michele dhe unë jemi shumë falënderues për atë që ky vend ka nënkuptuar për familjen tonë. Manchesteri do të jetë përgjithmonë në pasaportën e fëmijëve tanë – dhe më e rëndësishme, në zemrën e secilit prej nesh. Do të jetë gjithmonë shtëpia jonë. Nuk mund ta falënderojmë mjaftueshëm qytetin, klubin, stafin, bashkëlojtarët, shoqërinë dhe familjen, për këtë udhëtim dhjetëvjeçar”.
Kapiteni belg u transferua te City nga Wolfsburgu i Bundesligës në vitin 2015, për 76 milionë euro.
Trajneri Pep Guardiola iu bashkua klubit një vit më vonë dhe e ndihmoi zhvillimin e De Bruynes si mesfushor qendror. Ai e ndihmoi Cityn të shkëlqejë në periudhën e sukseseve që kulmoi me triumfin e parë në Ligën e Kampionëve në vitin 2023.
Por, De Bruyne nisi të ketë telashe fizike në vitet e fundit. Ai mungoi thuajse në pesë muajt e fundit të sezonit të kaluar, kur City e fitoi titullin e katërt rresht në Premier League, ndërsa luajti vetëm 26 ndeshje në të gjitha garat.
Ai po ashtu ndërpreu edhe negociatat për kontratën e re, teksa ishte duke u shëruar nga një lëndim muskulor të pësuar në muajin shtator.
Ish-mesfushori i Chelseat ka thënë se ka qenë “i hapur për çdo gjë” në verën e kaluar, pasi flitej për një kalim të tij në Arabinë Saudite.
