Truproja e Lionel Messit, Yassine Cheuko, është ndaluar të mbrojë sulmuesin argjentinas afër vijave të fushës gjatë ndeshjeve të Inter Miami, shkruan KosovaPress.
Ai u bë shumë i njohur pasi videot e mediave sociale treguan se ai po vëzhgonte nga afër turmën e tifozëve për të parandaluar gjithçka nëse ndonjë tifoz do të hynte në fushë dhe ta dëmtojë tetë herë fituesin e Topit të Artë.
Liga Amerikane (MLS) ka vendosur të marrë kontrollin e plotë të sigurisë në ndeshje, dhe Cheuko do të lejohet vetëm në dhomat e zhveshjes dhe në zona e deklarimeve për media, përcjellë KosovaPress.
“Nuk më lënë më të jem në fushë”, ka thënë truproja për mediat spanjolle. “Kam kaluar shtatë vjet në Evropë, duke punuar për Ligue 1 dhe Champions League , dhe vetëm gjashtë persona pushtuan fushën”.
“Unë erdha në Shtetet e Bashkuara dhe në vetëm 20 muaj, 16 njerëz e kanë bërë tashmë këtë. Ka një problem të madh këtu. Më lejoni të ndihmoj Messin”, ka shtuar ai.
