Muajin e kaluar u bënë 19 vjet nga zhdukja misterioze e Beti Grnçarovskës nga Tetova, një rast që dikur tronditi vendin, ndërsa sot pothuajse ka rënë në harresë për opinionin e gjerë.
E vërteta se çfarë ndodhi me gruan 38-vjeçare, e cila u largua nga shtëpia me pesë çanta, njëra prej të cilave ishte e mbushur me para, rreth 140 mijë euro, ende nuk është zbardhur. Ajo më parë kishte shitur dyqanin në Tetovë dhe kishte vendosur të niste një jetë të re në Split të Kroacisë.
Para se të largohej atë natë, ajo i kishte thënë nënës së saj, Ratka Kolevës, se një mik nga Tetova do ta priste në Shkup dhe më pas ishte nisur me taksi. Ajo nuk kishte dashur që nëna dhe vëllai ta shoqëronin deri në Shkup, duke u thënë se nuk dëshironte përshëndetje.
Më pas, ajo telefonoi në shtëpi dhe tha se kishte mbërritur në Shkup.
Shoferi i taksisë e kishte lënë para qendrës tregtare “Beverly Hills”. Atë natë, Beti pati kontaktin e fundit telefonik me nënën e saj.
Ndërkohë, miku me të cilin duhej të takohej në Shkup dhe së bashku të udhëtonin drejt Kroacisë, pretendonte se nuk kishin një marrëveshje të tillë dhe se nuk dinte asgjë për zhdukjen e saj.
Para kamerave televizive, rreth 15 vjet më parë, nëna e Betit tregonte se vajza e saj ishte e vendosur të kishte sukses në Kroaci dhe i kishte thënë vëllait se do ta merrte edhe atë atje.
Beti kishte plane për të ardhmen, ndërsa nëna e saj shprehej se ishte e bindur se vajza ishte rrëmbyer.
Në atë kohë, institucionet kompetente deklaronin se hetimi për rastin ishte në vazhdim. Megjithatë, deri më sot, zhdukja e gruas së re ka mbetur një mister.
Fotografia dhe të dhënat personale të saj janë publikuar në faqen e Ministrisë së Punëve të Brendshme për personat e zhdukur.
Beti Grnçarovska, e lindur më 21 janar 1968 në Tetovë, ku edhe ka jetuar. Përshkrimi: 175 centimetra e gjatë, flokë të zeza dhe protezë dentare.
Sipas të dhënave të publikuara, ajo është zhdukur më 12 gusht 2007 në Shkup.
Pasiguria për fatin e Betit, edhe pas 19 vitesh, mbetet një plagë e hapur për familjarët e saj.
