Akoma nuk kanë përfunduar bisedimet mes deputetëve të VLEN-it lidhur me atë se si ky koalicion do të paraqitet në zgjedhjet lokale. Deputeti Bekim Qoku thotë se i vetmi propozim që po diskutohet është ai i Aleancës për Shqiptarët që në zgjedhje të garojnë me lista të përbashkëta për këshilltarë komunal, pavarësisht se paraprakisht kreu i kësaj partie Arben Taravari kishte përmendur që të garojnë ndaras. Propozimi i ASH-së siç njoftoi Qoku, ka pëlqimin edhe të kryesisë së partisë.
“Diskutimi mbetet se cila komunë do të mund t’i takonte në bazë të hulumtimeve, shtrirjeve, anëtarësisë, anketimeve, cila komunë, pra kandidat për kryetar komune do t’i takonte cilës parti për ta drejtuar dhe natyrisht ka një lloj kombinimi shumë i mirë që nëse kandidati është i njërës parti, kryesuesi i listës të jetë nga tjetra, shtabin ta drejtojë një tjetër parti”, deklaroi Bekim Qoku – VLEN.
Deputeti i kësaj partie Rijad Shaqiri, thotë se janë në pritje edhe të propozimeve të partive tjera, që në fund të gjitha propozimet të gërshetohen dhe të arrihet deri te një marrëveshje.
“Është biseduar edhe versioni që të shkohet veç e veç për lista të këshilltarëve por ka edhe verzion tjetër që është me listë të përbashkët. Shihni, ne kemi menduar rreth një draft verzioni, kemi bashkëbiseduar edhe me kolegët, presim edhe nga ana e tyre të vijnë propozimet dhe t’i gërshetojmë propozimet dhe të shohim kush ku është me strukturat më i përfshirë dhe të kemi një përzgjedhje më të mirë”, u shpreh Rijad Shaqiri – VLEN.
Si Qoku ashtu edhe Shaqiri, mohojnë të kenë diskutuar për përqindje të komunave në dy mbledhjet e mbajtura deri më tani, ndërsa kandidatët do të ndahen varësisht prej asaj se cila parti ku ka shtrirje më të madhe të anëtarëve. Sa i përket komunave që rrezikojnë të humben, që të dy pohojnë se janë të gatshëm të diskutojnë edhe me Frontin Evropian me qëllim që të dalin me kandidat të përbashkët. Nga ajo që dihet publikisht deri tani, në Tetovë dhe Zhelinë do të jetë kandidat i Besës, në Gostivar kandidat i ASH-së ndërsa në Çair kandidat i LD-së. Lëvizja Vetëvendosje ndonëse nuk është e regjistruar si subjekt në Maqedoni por ka deputet, në zgjedhjet lokale nuk do të garojë as me kandidatë për kryetarë komunash e as me këshilltarë komunal. /Alsat.mk
