Qeveria e Hungarisë ka njoftuar se po tërhiqet nga Gjykata Ndërkombëtare Penale (GJNP).
Lajmin e ka dhënë zyrtari i lartë në qeverinë e kryeministrit Viktor Orban, Gergely Gulyas, i cili ka njoftuar për masën, disa orë pasi kryeministri izraelit Benjamin Netanyahu, i cili kërkohet sipas një urdhërarresti të lëshuar nga GJNP-ja, ka mbërritur në vend për një vizitë shtetërore.
Orbani e kishte ftuar udhëheqësin izraelit sapo ishte lëshuar urdhërarresti nëntorin e kaluar, duke thënë se vendimi nuk do të kishte “asnjë efekt” në vendin e tij, raporton BBC.
Në nëntor, gjykatësit e GJNP-së kanë thënë se kishte “bazë të arsyeshme” që Netanyahu të mbante “përgjegjësi penale” për krimet e supozuara të luftës dhe krimet kundër njerëzimit gjatë luftës midis Izraelit dhe Hamasit. Netanyahu e ka dënuar vendimin e GJNP si “antisemitik”.
Hungaria është një anëtar themelues i GJNP-së, i cili numëron 125 shtete anëtare. Shtetet e Bashkuara, Rusia, Kina dhe Izraeli nuk e njohin juridiksionin e saj, mes shteteve të tjera.
GJNP-ja ka autoritetin të ndjekë penalisht të akuzuarit për gjenocid, krime kundër njerëzimit dhe krime lufte në territorin e shteteve palë të Statutit të Romës, traktatit themelues të tij.
Izraeli e refuzon juridiksionin e GJNP-së, por gjykata ka vendosur në vitin 2021 se kishte juridiksion mbi Bregun Perëndimor të pushtuar, Jerusalemin Lindor dhe Gazën, sepse sekretari i Përgjithshëm i OKB-së kishte pranuar që palestinezët ishin anëtarë.
