LSDM, sipas rezultateve pas dy raundeve të zgjedhjeve lokale, do të udhëheq Shkupin dhe 56 komuna, BDI në 10, OBRM-PDUKM në 5, Aleanca për Shqiptarët në 3, BESA, PDSH dhe PDT në nga 1 komunë, ndërsa kandidatët e propozuar prej grupeve të votuesve në 3 komuna, përcjell Fol.
Përveç në Shkup, LSDM dhe koalicioni në raundin e parë të zgjedhjeve më 15 tetor fituan në 37 komuna: Qendër, Gjorçe Petrov, Karposh, Aerodrom, Haraçinë, Berovë, Manastir, Bogdanc, Bosillovë, Vallandovë, Vasilevë, Vevçan, Veles, Gjevgjeli, Debarcë, Dellçevë, Demir Hisar, Dojran, Zelenikovë, Konçe, Koçan, Kratovë, Kriva Pallankë, Krivogashtan, Krushevë, Kumanovë, Lozovë, Mavrovë Rostushe, Negotinë, Novosellë, Ohër, Pehçevë, Prilep, Radovish, Resnjë, Shën Nikollë dhe Strumicë.
Në raundin e dytë të zgjedhjeve LSDM kryetarë komunash fitoi edhe në 19 komuna: Butel, Gazi Babë, Kisella Vodë, Vinicë, Gradsko, Demir Kapi, Jagunovc, Karbinc, Makedonski Brod, Makedonska Kamenicë, Mogillë, Novaci, Probishtip, Rosoman, Nagoriçan i Vjetër, Çashkë, Çeshinovë Obleshevë, Shtip dhe Shuto Orizare.
BDI në raundin e parë zgjedhor fitoi mandate për kryetarë komunash në Kërçovë dhe në Pllasnicë, ndërsa në raundin e dytë edhe në Çair, Tetovë, Saraj, Dibër, Dollnen, Likovë, Tearcë dhe Strugë.
Aleanca për Shqiptarët i fitoi gjithsej tre mandate për kryetarë komunash, të gjitha në raundin e dytë dhe do t’i drejtojë komunat Bogovinë, Vrapçisht dhe Gostivar.
BESA fitoi në Zhelinë, PDSH në Studeniçan, Partia Demokratike e Turqve në Qendrën e Zhupës, ndërsa kandidatët të cilët u propozuan nga një grup votuesish do t’i udhëheqin komunat Rankovc, Çuçer Sandevë dhe Bërvenicë.
OBRM-PDUKM në raundin e parë fitoi në Ilinden, Petrovec dhe Sopishte, ndërsa në të dytin në Zërnovc dhe Kavadar. /Fol/
