Kandidati i VLEN-it për kryetar të Komunës së Bërvenicës, Jakup Huseini, ka zgjedhur një mesazh pajtues pas përfundimit të garës zgjedhore, duke uruar kundërkandidatin e AKI-së, Arkin Jahijin, për fitoren.
Huseini përmes një postimi ka pranuar rezultatin zgjedhor dhe i ka dëshiruar sukses Jahijit në drejtimin e komunës, duke theksuar se përfundimi i zgjedhjeve duhet të shënojë edhe fundin e përplasjeve politike.
“Zgjedhjet përfunduan, por Bërvenica mbetet shtëpia jonë e përbashkët. Pas një gare me shumë emocione, qytetarët meritojnë qetësi, bashkëpunim dhe përkushtim, pavarësisht përkatësisë politike apo etnike”, ka shkruar Huseini.
Urimi merr rëndësi edhe në kontekstin e garës së zhvilluar mes dy kandidatëve, e cila përfundoi me fitoren e Jahijit. Mesazhi i Huseinit shënon një qëndrim publik për pranimin e rezultatit dhe kalimin nga konkurrenca zgjedhore te përgjegjësia institucionale.
Ndërsa beteja për drejtimin e Bërvenicës tashmë ka përfunduar, sfida e re për fituesin mbetet bashkimi i qytetarëve dhe qeverisja e komunës përtej ndarjeve partiake. Gazeta Flaka
