Mbreti Abdallah II i Jordanisë, është pritur sot nga Papa Françesku, i cili i ka dhuruar një tablo të Qytetit të Vjetër të Jerusalemit, ku duket Kupola e Shkëmbit dhe Kisha e Varrit të Shenjtë dominuar nga kryqi.
“Miku im i shtrenjtë dhe vëlla”, deklaroi mbreti duke përshëndetur Papën në fillim të takimit të tyre në një klimë miqësore, theksuan gazetarët e pranishëm.
Papa e ka vizituar Jordaninë në maj të vitit 2014 në kuadër të një turneu në Lindjen e Mesme, që vijoi menjëherë në Jerusalem.
Në atë kohë ai bëri thirrje për akses të lirë për të gjithë besimtarët, hebrenj, myslimanë dhe të krishterë në vendet e shenjta.
Qeveria e Jordanisë, mbrojtës i vendeve të shenjta myslimane në Jerusalem, e cilësoi shkelje të të drejtës kombëtare vendimin e fundit të presidentit amerikan, Donald Trump për të njohur Qytetin e Shenjtë si kryeqytet të Izraelit.
Papa Françesku kishte kërkuar respektim të statu quo-së për Jerusalemin, konform rezolutave të Kombeve të Bashkuara, që kërkojnë një zgjidhje të negociueshme për qytetin që izraelitët dhe palestinezët e pretendojnë si kryeqytet.
Vatikani përmendi sot në një komunikatë bisedat miqësore mes Papës dhe mbretit, përqendruar në temat për promovimin e paqes dhe stabilitetit në Lindjen e Mesme duke iu referuar veçanërisht Jerusalemit dhe rolit të sovranit si mbrojtës i vendeve të shenjta. “Në këtë kontekst, ata përsëritën angazhimin e tyre për të inkurajuar negociatat mes palëve të interesuara dhe për të promovuar dialogun ndërfetar”, sipas komunikatës.
