Një person i armatosur ka hapur zjarr sot pranë një kishe në periferi të Kajros dhe në një dyqan të afërt, ku nga shkëmbimi i zjarrit kanë humbur jetën së paku 9 persona, në mesin e të cilëve 8 krishterë, thanë autoritetet egjiptiane.
Po ashtu një oficer i policisë ka humbur jetën, ndërsa edhe sulmuesi është vrarë, njoftuan zyrtarët.
“Pesë vetë u plagosën, duke përfshirë edhe një oficer tjetër të policisë”, tha zëdhënësi i Ministrisë së Shëndetësisë, Khaled Megahed.
Sulmi filloi kur personi i armatosur me një motoçikletë u përpoq të thyej kordonin e sigurisë jashtë Kishës Koptike të Mar Mina.
Nuk ishte e qartë se sa sulmues ishin përfshirë në sulm. Ministria e Brendshme e Egjiptit përmend vetëm një sulmues, por kisha ortodokse koptike njoftoi se ishin disa “njerëz të armatosur”.
