MEPSO sot ka dorëzuar përllogaritjen e kostove në Komisionin Rregullativ dhe ka kërkuar rritje të çmimit të energjisë elektrike për 68 për qind, transmeton TetovaSot.
Paraprakisht të njëjtën gjë kanë bërë edhe kompanitë energjetike duke i dorëzuar Komisionit llogaritjet e kostos.
Të gjitha kompanitë kanë raportuar humbje dhe kanë kërkuar rritje të çmimit të energjisë elektrike, por në shuma të ndryshme, por për momentin nuk dihet se sa kërkojnë kompanitë e tjera.
MEPSO bën të ditur se kërkesa për rritje prej 68 për qind ka ardhur për shkak të rritjes së kostove të furnizimit me energji elektrike për të mbuluar humbjet në rrjetin e transmisionit, të cilat blihen nga tregu i lirë.
“Arsyet e një kërkese të tillë janë të shumëanshme dhe nuk janë për shkak të përkeqësimit të rezultateve në punën e kompanisë, por për arsye objektive në të cilat AD MEPSO nuk ka ndikim”, tha MEPSO.
Tashmë i takon rregullatorëve që të vendosin se cilën nga kostot e raportuara do të pranojnë dhe njohin dhe cila do të jetë rritja e çmimit të energjisë elektrike. Kryetari i Rregullatorit, Marko Bislimovski, tha se rritja është e sigurtë se do të jetë mbi 10 për qind dhe ia atribuoi komunave që në vend të tregut të lirë furnizohen me energji elektrike direkt nga EVN Home dhe për vetëm disa muaj shpenzojnë energji në vlerë prej 30. milionë euro.
Krahas çmimit të energjisë elektrike në rregullator, po përgatiten edhe bllok tarifat, të cilat do të jenë tre ose katër, varësisht nga sasia e energjisë elektrike që konsumon amvisëria dhe nga e cila do të varet edhe çmimi i energjisë elektrike.
Çmimi i ri duhet të miratohet në qershor dhe duhet të jetë i vlefshëm nga 1 korriku./TS
