Vendimi i Këshillit të Qytetit të Shkupit, për largimin nga qarkullimi i autobusëve publikë me numër 9 dhe 19, pritet të korrigjohet në seancën e radhës që do të mbahet më 16 shkurt. Kaosi në transportin publik, i krijuar me largimin e këtyre dy linjave, ndoshta më të frekuentuara në qytetin e Shkupit, ka ndikuar që s’i rrallë herë deri më sot ,këshilltarët shqiptar në këtë institucionet t’i harmonizojnë qëndrimet e veta dhe të reagojnë njëzëri ndaj diskriminimit dhe padrejtësisë që u është bërë një pjesë të bukur të banorëve të kryeqytet, të cilët kryesisht jetojnë në Çair, Butel dhe Shuto Orizare.
“Pasi kryetari i Qytetit të Shkupit e pranoi se është bërë një lëshim lidhur me këtë çështje, ai bashkërisht me përfaqësues të Ndërmarrjes Publike “Transporti Publik Shkup” dhe Sektori për komunikacion që funksionon në kuadër të qytetit, e kanë formuar grupin punues, i cili gjatë periudhës që ka kaluar dhe asaj që ka ngelur deri në mbledhjen e ardhshme me 16 shkurt, do t’i shqyrtojnë mundësitë më të volitshme që autobusët publik me numër 9 dhe 19 të rikthehen në shërbim të qytetarëve, ndërsa kërkesë shtesë e jona ka qenë edhe shtimi i autobusëve me numër 12”, ka thënë për gazetën KOHA, Qemal Musliu, koordinator i Këshilltarëve të BDI-së në Qytetin e Shkupit.
Nevoja e qytetarëve për këto linja të autobusëve, të cilët për momentin funksionojnë vetëm me autobus privat, ka ndikuar që shumë udhëtar të ankohen se nga fillimi i vitit të ri e deri më sot, atyre u është cenuar e drejta publike duke u përballur me kushte të ndryshme klimatike siç ishin temperaturat e ulëta deri në minus 20 gradë dhe ndotja enorme e ajrit, për të cilët autoritet e Qytetit të Shkupit, vazhdimisht apelojnë që të shfrytëzohet ky lloj i transportit.
