Ambasadori i Shteteve të Bashkuara të Amerikës në Kosovës, Philip Kosnett, e ka vlerësuar reagimin e qytetarëve të Kosovës lidhur me rastin e vdekjes së afro-amerikanit George Floyd.
Në një mesazh të shpërndarë në Facebbok, ambasadori Kosnett i ka falënderuar qytetarët e Kosovës që kanë shprehur ngushëllime dhe shqetësimeve për vdekjen e Floydit. Ai ka thënë se autoritetet shtetërore amerikane janë të përkushtuara për drejtësi pas këtij rasti.
Ambasadori Kosnett ka theksuar se Amerika do të dalë më e fuqishme pas trazirave që shkaktoi vdekja es së afroamerikanit George Floyd në duart e policisë.
“Dëshiroj t’i falënderoj ata qytetarë të Kosovës që kanë shprehur ngushëllimet dhe brengën e tyre për vdekjen e Xhorxh Flojdit (George Floyd). Qeveria federale, si dhe autoritetet e shtetit federal dhe ato lokale – dhe populli amerikan – janë thellësisht të përkushtuara për drejtësi për Z. Floyd dhe familjen e tij”, ka thënë Kosnett.
Ai ka rikujtuar edhe fjalët e presidentit Trump, i cili vdekjen e George Floyd-it e ka cilësuar si një tragjedi të rëndë që nuk do të duhej të kishte ndodhur kurrë.
“Presidenti Trump ka deklaruar: ‘Vdekja e George Floydit në rrugët e Mineapolisit ishte tragjedi e rëndë, që nuk do të duhej të kishte ndodhur kurrë. Ajo i ka mbushur amerikanët anembanë vendit me ndjenjë të tmerrit, zemërimit dhe pikëllimit…” Prokurorët kanë ndërmarrë hapa të shpejtë për ngritjen e akuzës, duke respektuar plotësisht një proces të drejtë për të gjithë të përfshirët në rast”, ka shtuar Kosnett.
“Si amerikan dhe si njeri, e ndaj zemërimin për vdekjen e Z. Floyd dhe i kam shikuar ngjarjet që pasuan në rrugët e qyteteve amerikane me shqetësim të thellë. Përderisa vazhdojmë të përfytemi me diskriminimin në jetën dhe drejtësinë amerikane, objektet si Memoriali Kombëtar për Paqe dhe Drejtësi dhe Muzeu i Trashëgimisë (https://museumandmemorial.eji.org/memorial) na ndihmojnë të ekzaminojmë të kaluarën në mënyrë të sinqertë dhe ta dyfishojmë vendosmërinë tonë për të mundësuar drejtësinë në të tashmen“, ka thënë Kosnett.
“Unë besoj se Amerika do të dalë nga ky çast i tmerrshëm më e fuqishme dhe edhe më e përkushtuar për të gjetur rrugën përpara për të përmbushur premtimin historik të të drejtave të barabarta dhe drejtësisë së barabartë për të gjithë qytetarët. Kjo do të kërkojë veprim të bashkërenditur të qeverisë dhe qytetarëve, me ndihmën e shtypit të lirë. Të njëjtën gjë e duam edhe për Kosovën”, ka përfunduar Kosnett.
(r.m.)
