Bashkimi Demokratik për Integrim (BDI) e përkrah qëndrimin e ministrit të jashtëm maqedonas, Nikolla Dimitrov, kundër vendimit të kryeministrit kosovar Ramush Haradinaj, për ndarjen e 290 mijë eurove pjesëtarëve të viktimave dhe të dënuarëve nga Grupi i Kumanovës, shkruan Gazeta Lajm. BDI është pjesë e qeverisë ku Dimitrov është ministër i punëve të jashtme. Nga kjo parti nuk janë distancuar nga qëndrimi i Dimitrovit, që sipas njohësve të rrethanave politike, tregon qartë se e përkrahin atë qëndrim.
Ndryshe, dy ditë më parë, Qeveria e Maqedonisë ka kundërshtuar ndarjen e mjeteve nga ana e Qeverisë së Kosovës për familjarët e të dënuarave në rastin “Kumanova”, në Maqedoni, shkruan agjencia e lajmeve INA.
Këto shqetësime i ka shprehur ministri i Jashtëm i këtij shteti, Nikolla Dimitrov, gjatë një takimi që ka pasur me ministren e Integrimeve të Kosovës, Dhurata Hoxha, në suaza të Konferencës rajonale “Ndërtimi i kapaciteteve dhe bashkëpunimit rajonal në procesin e integrimit evropian të shteteve të Ballkanit Perëndimor”, e cila këto ditë mbahet në ministrinë e Punëve të jashtme të Maqedonisë.
Ministri Dimitrov vlerësoi se vendimi i Qeverisë së Kosovës për ndarje të mjeteve financiare për përkrahje materiale të familjeve të personave të dënuar, shtetas të Kosovës, nuk është në pajtim me vlerat europiane dhe ndërtimit të ardhmërisë europiane të rajonit që bazohet në
sundimin e të drejtës, gjë që është interes i përbashkët i të dy shteteve. Në këtë takim u shkëmbyen mendime për bashkëpunimin rajonal dhe atë bilateral, të cilët shënojnë rritje në periudhën e fundit.
Në atë kontekst, u bisedua për mundësitë për avancim të bashkëpunimit me Republikën e Kosovës në planin e integrimeve evropiane dhe për ofrimin e përvojave të fituara të Republikës së Maqedonisë në atë drejtim. Qeveria e Kosovës të premten ka ndarë 290 mijë euro për familjarët e të dënuarëve në rastin “Kumanova”.
