Një aferë e madhe korruptive, e cila u trajtua nga Gjykata e Neë Yorkut, ka prekur rëndë drejtuesit më të lartë të partisë shqiptare në Qeverinë e Maqedonisë, Bashkimit Demokratik për Integrim.
Kryetari i kësaj partie, Ali Ahmeti dhe bashkëpunëtori i tij i ngushtë, Musa Xhaferi, njëherësh zëvendëskryeministër për implementimin e Marrëveshjes së Ohrit, akuzohen se kanë marrë 5 milionë euro nga “Magjar Telekom”, njofton korrespodenti i “Koha Ditore” nga Shkupi.
Ish-shefi i policisë sekrete të Maqedonisë dhe ish-këshilltari i Qeverisë, Sllobodan Bogoevski, në dëshminë e tij dhënë avokatit të Komisionit amerikan për letër me vlerë (SEC), lidhur me rastin “Magjar Telekom” dhe kompanisë së saj motër – “Telekomi i Maqedonisë”, në mënyrë të hollësishme i përshkruan të gjitha operacionet dhe aktivitetet në të cilat ka marrë pjesë edhe ndërmjetësuesi i tyre, i angazhuar nga biznesmeni kontrovers grek, Dimitris Kondominas, transmeton Koha.net.
Para gjykatës së Neë Yorkut, Bogoevski ka folur për miton e marrë nga partnerët shqiptarë të Qeverisë së vitit 2005-2006 të drejtuar nga ish-kryeministri Vllado Buçkovski me qëllim të korruptimit të tyre.
Kështu, në transkriptin e publikuar në 166 faqe, Bogoevski i përmend Buçkovskin dhe personat A.A. dhe M.Xh. se në më shumë raste, më ndërmjetësim të njerëzve të Kondominas, kanë marrë mito në vlerë prej 7.5 milionë euro (në kesh).
I pyetur nëse i njeh personat me inicialet A.A. dhe M.Xh., Bogoevski thotë se ata janë Ali Ahmeti dhe Musa Xhaferi dhe sipas tij paratë u janë dhënë për t’i korruptuar zyrtarët shqiptarë.
Bogoevski thotë se partnerët shqiptarë të Qeverisë së atëhershme kanë kushtëzuar nënshkrimin e Protokollit për bashkëpunim në mes të dy palëve, me pagesën e këstit të parë të shumës së marrëveshjes për ryshfet në vlerë 2.5 milionë euro, transmeton Koha.net.
Bashkëpunëtorë të Buçkovskit dhe Kondominasit kanë udhëtuar për në Tetovë tek shtëpia e Abdilhalim Kasamit, shef i atëhershëm i financave në BDI, thotë Bogoevski, sipas të cilit aty kanë qenë edhe Ahmeti dhe Xhaferi.
Ahmeti dhe Xhaferi e kanë paditur Bogoevskin për gjoja shpifje ndaj tyre, për shkak të dëshmisë që ka prezantuar para gjykatës së Nju Jorkut. Mirëpo ai është i bindur se nuk ka bazë për padi, por se në këtë mënyrë krerët e BDI-së po i bëjnë presion për shkak të procesit të hapur në Maqedoni për rastin e larjeve të parave.
Ai poashtu vlerëson se padia e Ahmetit dhe Xhaferit ka për qëllim ta heshtë atë lidhur me aferat tjera që kanë ndodhur brenda Telekomit, transmeton Gazeta Lajm.
“Gjykata është degë e një organizate kriminele dhe nuk ka për qëllim ta zbulojë të vërtetën, por të mbrojë disa interese tjera. Kjo u pa që kur u largua gjykatësja paraprake. Ajo e kontestoi padinë sepse nuk ka kurrfarë baze. Kjo seancë përgatitore kundër mua refekton gjendjen në gjyqësoirn e Maqedonisë për të cilën me vite flasim se duhet të reformohet”, ka deklaruar Bogoevski për PlusInfo.
