Presidenti i Turqisë, Recep Tayyip Erdoğan pas takimit me homologun e tij rus Vladimir Putin deklaroi se referendumi kurd në Irak nuk ka legjitimitet dhe se mbështesin integritetin territorial të Irakut dhe Sirisë, raporton Anadolu Agency (AA).
“Për fat të keq, rajoni ynë po bëhet shumë më i brishtë në periudhën e fundit. Referendumi kurd nuk ka legjitimitet nga pikëpamja e Kushtetutës së Irakut dhe ligjit ndërkombëtar. Për fat të keq, pavarësisht nga të gjitha vërejtjet miqësore, Administrata rajonale ka bërë një gabim të madh duke organizuar referendumin. Siç kemi thënë gjithmonë, askush nuk ka të drejtë të hedh zjarr, të përshkallëzojë tensionet në rajonin tonë, për hir të interesave personale afatshkurtra”, tha Erdoğan në rezidencën presidenciale në Ankara ka mbajti një konferencë të përbashkët për media me presidentin rus Putin.
“Si Turqia ashtu edhe Rusia, kemi konfirmuar edhe një herë vendosmërinë tonë për të vazhduar bashkëpunimin e ngushtë dhe për të ruajtur vullnetin tonë të përbashkët që konflikti i Sirisë të zgjidhet me rrugë politike”, theksoi Erdoğan në lidhje me problematikën e Sirisë.
Duke vënë në dukje se me Putinin kanë diskutuar çështjet rajonale, përfshirë Irakun dhe Sirinë, Presidenti Erdoğan tha se “Ne jemi dakord për integritetin territorial të Irakut dhe edhe të Sirisë”.
Ndërsa presidenti rus Putin tha se me krijimin e “zonave jokonfliktuale” në Siri i ka dhënë një hov të rëndësishëm procesit të Gjenevës.
Pasi ka vënë theksin se ka qenë i vështirë krijimi i “zonave jokonfliktuale” në Siri, presidenti Putin theksoi se me iniciativën dhe vullnetin e presidentit Erdoğan kanë arritur një sukses të rëndësishëm.
Presidenti turk Rexhep Taip Erdogan priti këtë të enjte në Ankara homologun e tij rus, Vladimir Putin. Dy krerët e shteteve zhvilluan një takim kokë me kokë, temat kryesore të të cilit ishin situata në Siri, të dyja vendet kërkojnë vendosjen e zonave të sigurta në Siri.
Po ashtu, ujdia për blerjen e sistemeve raketore ruse S-400 nga Turqia ishte një temat e takimit. Putin dhe Erdogan shpresojnë në një forcim të marrëdhënieve mes vendeve, duke rritur nga ana tjetër shqetësimin e Perëndimit për aleancën Turqi-Rusi.
