Kryeministria e Greqisë në lidhje me vendimin gjyqësor për mos ekstradimin e 8 ushtarakëve turq ka theksuar se “përgjegjësi i vetëm i vendimeve në fjalë në Greqi është drejtësia e pavarur greke dhe vendimet e gjykatës janë të detyrueshme në mënyrë të qartë”.
Në një deklaratë me shkrim nga kryeministria pas vendimit për mos ekstradimin e ushtarakëve rikujtohet se Greqia ka dënuar që në momentet e para grushtin e shtetit dhe se ka mbajtur qëndrimin e saj në krah të qeverisë së zgjedhur në Turqi, përcjell ksp.
Në deklaratë ndër të tjera theksohet se “në çdo rast, Greqia është një shtet i së drejtës. Është i garantuar me kushtetutë, parimi i ndarjes së pushteteve, që është i padiskutueshëm dhe tregon respektimin e plotë të të drejtës ndërkombëtare duke përfshirë marrëveshjet ndërkombëtare që kanë lidhje me vendin”, transmeton Koha.net.
Duke u tërhequr vëmendja se puçistët nuk janë mirëpritur kurrë në Greqi thuhet se, “përgjegjësi i vetëm i vendimeve në fjalë në Greqi është drejtësia e pavarur greke dhe vendimet e gjykatës janë të detyrueshme”.
Pas proceseve gjyqësore në shkallë të ndryshme të gjykatave në Greqi, Gjykata e Lartë e Greqisë (Arios Pagos), vendosi për mos ekstradimin në Turqi të 8 ushtarakëve të cilët u arratisën në Greqi pas pjesëmarrjes në tentativën për grusht shteti më 15 korrik, për të cilën Turqia e akuzon organizatën FETO.
