Kryetari i Aleancës për Ardhmërinë e Kosovës, Ramush Haradinaj, ka reaguar pas deklaratës së kryeministrit të vendit, Avdullah Hoti, se në Bruksel nuk ka biseduar për autobusë, por për njohje reciproke mes Kosovës dhe Serbisë – dhe se këtë e di shefi i AAK-së.
Sot, Haradinaj ka thënë se edhe di, edhe nuk e di se çfarë ka folur shefi i Qeverisë, pjesë e së cilës është edhe partia e tij.
“Shyqyr që s’ke folur për autobusë, se s’je drejtor i stacionit të autobusëve”, është shprehur Haradinaj në Kanal10.
“E di çfarë ka folur kryeministri im në Bruksel, me z. Borrell e të tjerët. Por nuk e di çfarë ka folur me presidentin Vuçiq”, ka deklaruar i pari i AAK-së.
Ai ka shprehur përsëri pakënaqësinë e tij që ministrat e AAK-së nuk u përfshinë në takime.
Haradinaj ka shprehur habinë e tij se pse, siç është shprehur ai, dikujt i kanë penguar ministrat Selim Selimi e Meliza Haradinaj.
