Kam nënshkruar një dokument që e kam pa aktakuzë, por ju them të drejtën as lexu nuk e kam.”
Nënkryetari i Organizatës së Veteranëve të Luftës së UÇK-së, Nasim Haradinaj, nuk ka pranuar të deklarojë fajësinë apo pafajësinë para Dhomave të Specializuara në Hagë.
Një nga pjesëtarët e parë të luftës për çlirim u arrestua në fund të shtatorit nga EULEX-i pasi zbuloi se dispononte dokumente konfidenciale të cilat komprometonin pozitat e prokurorëve të specializuar dhe të Gjykatës Speciale në raport me hetimet për krime lufte ndaj Serbisë.
Haradinaj tha se përgjegjësinë për nxjerrjen e dokumenteve duhet ta mbajnë ndërkombëtarët.
“Pra, ne duhet të përgjigjemi se pse ju dolën sekretet e tyre, dhe u sollën mijëra km larg në zyrat tona, dhe mos harroni, ato nuk ishin as një as dy fletë, por mijëra fletë e faqe.”
Ish-luftëtari i UÇK-së argumentoi se dokumentet e hetuesve ai i siguroi nga persona anonimë, dhe se ai tani po konfirmonte frikën fillestare që kishte mbi Prokurorinë e Specializuar.
“Për mendimin tim, kjo prokurori është së pari politike, selektive dhe njëanshme, por tani me këtë veprim të tyre po dyshoj dhe bindem se është e dhe e korruptuar sepse ndryshe nuk do u dilte gjithë ai material nga zyrat e tyre.”
Avokati i Haradinajt deklaroi se nuk ka pasur mundësi të konsultohet me klientin e tij ndërkohë që i është lënë 30 ditë afat për t’u deklaruar rreth veprave penale të pengimit të personave në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës.
Të njëjtat akuza iu cituan të premten edhe Hysni Gucatit, zëvendëskryetarit të OVL-UÇK-së, i arrestuar njëkohësisht me të më 25 shtator.
