Në kremtimin e 15 vjetorit të ENTSO-E, Operatorët e Sistemit të Transmisionit nga Komuniteti Energjetik i Ballkanit Perëndimor, nënshkruan një Deklaratë të Përbashkët e cila mund të konsiderohet historike mbi koordinimin rajonal.
Kjo deklaratë u mbështet nga të gjithë Operatorët e Sistemit të Transmisionit të Bashkimit Europian si dhe nga operatorët e Europës Juglindore (MEPSO – Maqedoni e Veriut, NOSBIH
– Bosnjë dhe Hercegovinë, OST – Shqipëri, EMS – Serbi dhe CGES – Mali i Zi) dhe e njëjta është dakorduar edhe me KOSTT (Kosovë), të cilët po ashtu janë ftuar të bashkangjiten me operatorët tjerë nga rajoni.
Kjo deklaratë, e mundësuar nga ENTSO-E, përfshinë një kornizë të re gjithëpërfshirëse të bashkëpunimit për OST-të e Ballkanit Perëndimor brenda Europës Juglindore. Ky dokument është zgjidhja më e mirë e mundshme, që merr parasysh nevojat dhe situatat reale të të gjitha vendeve që bëjnë pjesë në Europën Juglindore, në përputhje me legjislacionin e Bashkimit Europian dhe të Komunitetit të Energjisë.
Deklarata hap mundësinë e organizimit teknik dhe tregtar në fusha për operimin e koordinuar të sistemit të energjisë elektrike, si dhe tregtimin dhe ankandimin e energjisë elektrike, duke lidhur OST-të nga Ballkani Perëndimor me zonat tashmë të organizuara të Europës Qendrore dhe Juglindore.
‣ Rezultatet kryesore të deklaratës përfshijnë:
• Forcimin e sigurisë energjetike dhe integrimin e tregut të energjisë elektrike.
• Vendosjen e kornizave të reja ligjore për koordinim rajonal pa pengesa.
• Sigurimin e alokimit efektiv të kapaciteteve, menaxhimin e mbingarkesave dhe ndarjen e të ardhurave.
Kjo marrëveshje krijon një mundësi për bashkim të përshpejtuar të tregjeve në Europën Juglindore. Një bashkim i tillë i tregjeve është një nga parakushtet kryesore që duhet të plotësojnë vendet e Ballkanit Perëndimor për të marrë një përjashtim nga Taksa e Mekanizmit të Rregullimit të Kufirit të Karbonit të Bashkimit Europian.
Kjo deklaratë e përbashkët mundëson një rrugë reale dhe të përbashkët për të ardhmen e Europës Juglindore në kuadër të sistemit energjetik europian.
