Deklaratave të Presidentit maqedonas George Ivanov për përbuzjen e gjuhës shqipe, Kryeministri Edi Rama i ka kthyer përgjigje në rubrikën e tij Amarcord, ku kujton figurat më të ndritura të historisë së Shqipërisë.
Përmes një postimi në Facebook, Rama vlerëson bandën muzikore të shqiptarëve të Shkupit.
Rama shkruan se identiteti i vërtetë i shqiptarëve etnik është frut i luftës për emancipim kulturor, arsimor dhe gjuhësor.
Postimi në Facebook i Kryeministrit Edi Rama:
AMARCORD
Në mars 1912, 105 vjet më parë, banda muzikore shqiptare në Shkup i linte trashëgim historisë dhe mendjeve të ndriçuara, nëpërmjet kësaj fotoje të Marubit, mesazhin gjithmonë të vlefshëm, se identiteti i vërtetë i shqiptarëve etnikë është frut i luftës për emancipim kulturor, arsimor dhe gjuhësor dhe jo i dyfekut të përçarjes apo mbisundimit mbi tjetrin.
Megjithëse në distancë të barabartë mes Perëndimit dhe Lindjes, kjo është një nga vetitë që na bën parësisht europianë, të besës, paqedashës, shtetformues dhe universalistë kudo ku jemi autoktonë.
