“E njoh Mijallkovin”, “I fortë është”, “Baba Mijallkov”, ishin shprehjet që shumë shqiptarë i thonin me krenari nëpër kafene e çajtore.
Por thuhej edhe nga politikanë e zyrtarë shqiptarë, që gjithçka e ndërlidhnin me ish-shefin e shërbimit sekret DSK, Sasho Mijallkov, informon INA.
Kishte nga ata që dilnin edhe në fotografi në facebook, duke u krenuar se e njihnin njeriun që vendoste për gjithçka në Maqedoni.
Por sot ka një heshtje. INA ka kontaktuar në facebook me një shqiptarë që në albumin e tij mban foton e Mijallkovit, por s’ka pasur përgjigje.
Për ate se Mijallkovi vendoste për gjithçka dëshmojnë edhe “bombat” e Zaevit, ku dëgjoheshin biseda se si ish-shefi i shërbimit sekret realizonte punësime të shqiptarëve, duke kënaqur apetitet e të gjithve, por vendoste emërime të caktuara të kuadrove shqiptare edhe nëpër institucione të larta.
Edhe nga politikanë e zyrtarë të partive nuk duan të flasin për protagonistin e mirënjohur të ish-qeverisë së kaluar, i cili kontrollonte gjithçka në Maqedoni.
Nga ana tjetër, adhurimi i tij kishte shkuar aq larg sa që shumë përkrahës të tij kishin bërë edhe tatuazhe në trup me profilin e tij.
Njeriu që dikur mbante këtë famë mes disa shqiptarëve, sot është i akuzuar i Prokurorisë Speciale, për veprime kriminale që kanë të bëjnë me përgjimet. Atij i është konfiskuar vetëm pasaporta, ndërsa nuk ka masë paraburgimi. (INA)
