Mbrëmë në Teatrin e Kumanovës për herë të parë është anuluar një shfaqe, edhe atë për arsye banale.
Tonisti maqedonas ka refuzuar që të punojë për shfaqen shqiptare, ndërsa nga ana tjetër i punësuari i ri në këtë pozitë, i cili është shqiptar, ende me përvojë të pamjaftueshme nuk ka ditur se si zbatohet e njëjta.
Drejtori i Teatrit të Kumanovës “Trajko Prokopiev” nga radhët e LSDM-së, Sasho Todorovski përdor standarde të dyfishta. Aktorët janë shprehur të indinjuar duke theksuar se kjo i bie që nëse kishte qenë fjala për shfaqe maqedonase do e zgjidhte problemin, ndërsa për shfaqe shqiptare nuk dha asnjë përgjigje nga telefonata që ia bëri organizatori para shfaqjes, edhe pse, për këtë problem ishte i paralajmëruar disa ditë përpara.
Përgjegjësi artistik, Musa Isufi përmes një postimi në Facebook ka reaguar me atë që ndodhi mbrëmë në Teatrin e Kumanovës. Ai njëherit i ka kërkuar ndjesë publikut të Kumanovës për dështimin e mbrëmshëm.
Isufi thotë se në skandalin e mbrëmshëm fajin kryesor për mos mbajtjen e reprizës së shfaqjes “39 shkallët” e ka vetëm një person (tonisti maqedonas) i autorizuar nga ish-përgjegjësi artistik i teatrit shqiptar të Kumanovës dhe drejtorit gjeneral për ta kryer punën e tonistit në këtë shfaqe. /Zhurnal/
