“Shqiptarët janë njerëz të besës, prandaj duhet punuar me ta“. Kryeministri serb, Aleksandar Vuçiç, ka vlerësuar lart shqiptarët si karakter, duke kërkuar nga biznesmenët serbë të punojnë dhe të investojnë në Shqipëri.
Ai tha se në kohën kur ekonomia është e rëndësishme, ky është patriotizëm dhe kjo është rruga e vetme që duhet ndjekur.
“Dua të inkurajoj njerëzit tanë të shkojnë në Shqipëri, të ndërtojnë objekte turistike, të krijojnë kompani të përbashkëta. Shqiptarët e mbajnë fjalën dhe janë njerëz të mirë dhe të punës. Unë jam ndoshta subjektiv, por dua t’u them se kjo është e mirë për Serbinë dhe punoni mirë me ta. I kuptojmë ndarjet politike, por duhet t’i kthehemi të ardhmes”, tha Vuçiç.
Forumi i Biznesit Shqipëri-Serbi në qytetin e Nishit ka zgjuar kureshtjen e qindra gazetarëve dhe biznesmenëve serbë. Në një takim më të relaksuar se në Beograd, tani duket se gjuha ka ndryshuar.
Edi Rama, pikërisht në 2-vjetorin e dronit, në Nish ka theksuar se nëse shihet mbrapa, është arritur shumë në marrëdhëniet në mes të dyja vendeve. Ai tha se në atë kohë nuk mund të imagjinohej një takim i tillë.
“Një nga arsyet pse ne prodhojmë më shumë histori sesa ç’mund të tresim është se jemi të vegjël dhe kur vjen puna të mendojmë për tregun, tregjet tona janë shumë të vogla të ndara nga njëri-tjetri në një botë që sa vjen dhe bëhet gjithmonë e më e egër nga pikëpamja e konkurrencës. Por ama, nëse ne arrijmë që kush investon në Tiranë, Beograd, Prishtinë, Podgoricë e kështu me radhë të mos investojë thjeshtë brenda kufijve të një tregu të vogël, por të investojë në një treg të gjerë rajonal kemi garantuar një kapërcim historik për njerëzit në funksion të zhvillimit dhe mirëqënies së tyre”, tha Rama.
Forumin e ka hapur Marko Cadez, kryetar i Dhomës së Tregtisë së Serbisë, i cili tha se ka bërë një punë që duhet vazhduar në përmirësimin e marrëdhënieve. Ai, fjalimin e tij e hapi duke cituar një kronikë të Top Channel si shembull: “Kam parë një kronikë të një televizioni shqiptar për sallatën shqiptare që gatuhet vetëm në Nish. Kjo është një nga 100 kronikat që janë bërë për këtë, por gazetari shqiptar Idro dhe operatori serb Zhivojin gjithmonë bëjnë punë bashkë dhe i prijnë asaj për të cilën ne jemi mbledhur këtu dhe madje ky televizion ka bërë kronikën më të mirë dhe më pozitive. Andaj ju ftoj të krijojmë ne rrëfimet tona”.
Rama e Vuçiç janë takuar sërish, ndërsa kryeministri shqiptar është takuar edhe me biznismenet. Historia mund të ndryshojë nëse ekonomia merr kryefjalën, duke bërë kthesë në të mirë të zhvillimit.
Kryeministri i Serbisë, Aleksandar Vuçiq, ka deklaruar sot se Durrësi do të jetë porti më i afërt për Serbinë, pas ndërtimit të austostradës Nish – Prishtinë – Tiranë – Durrës.
“Pas ndërtimit të kësaj rruge prej Beogradit për në Durrës, do të udhëtohet katër orë e gjysmë”, tha Vuçiq në forumin biznesor Serbi – Shqipëri, që po mbahet në Nish.
Mëtutje, ai ka përkujtuar se këmbimi tregrar i Serbisë me Shqipërinë është 102 milionë euro në vit dhe ka vlerësuar se ekzistojnë kushte që ky këmbim të jetë edhe më i madh, por për këtë duhet eliminuar barrierat administrative dhe doganore, pasi vetëm për një ditë të pritjes në doganë, vlera e prodhimeve bujqësore zvogëlohet për 7%.
“Shpenzimet logjistike në Ballkanin Perëndimor janë 16% të GDP-së, ndërsa në Bashkimin Evropian, ato janë 8%”, tha Vuçiq.
Kryeministri i Serbisë ka vlerësuar se shqiptarët janë biznesmenë të mirë dhe se ndërmarrësit serbë duhet të bashkëpunojnë me ta dhe të investojnë në Shqipëri.
