Lëvizja BESA – Gostivar: Bejta u premton shqiptarëve, por u kryen punë maqedonasve

Levizja-Besa-Logo

Mospërfillja e autoriteteve të Komunës së Gostivarit ndaj kërkesave disavjeçare të banorëve shqiptarë të fshatrave të malësisë për rregullimin e rrugës kryesore që i lidh ata me qytetin e tyre, është bërë shqetësim i madh për banorët e kësaj ane të Gostivarit. Banorët e fshatrave, si Sërmnova, Tërnova, Strajani, Patalishti, por edhe Llakavica, tashmë një kohë të gjatë përballen ditë për ditë me gjendjen e vështirë të rrugës së vetme që i lidh ato me qytetin e Gostivarit. Ata vazhdimisht e kanë ngritur zërin dhe kanë kërkuar rregullimin e kësaj rruge, që mund të ngjajë në gjithçka, por jo në një rrugë të shekullit dhe kohës në të cilën jetojmë.

Ndonëse kryetari i Gostivarit, N. Bejta, ka rrahur gjoksin nëpër fushatat parazgjedhore, duke premtuar rregullimin e kësaj rruge, në saje të së cilës edhe ka rrëmbyer votat, ai premtim deri më sot ka mbetur i njëjtë me hapjen e kufirit Llojan-Miratoc.

Që revolta e këtyre të jetë edhe më e madhe kësaj i ka ndihmuar vetë kryetari Bejta, i cili në vend se të mbajë premtimin e dhënë ndaj banorëve shqiptarë, shkoi dhe investoi në fshatin Cerovë të banuar me maqedonas, ndonëse numri i banorëve të fshatit në fjalë numërohet me gishtat e njërës dorë dhe as që krahasohet me nevojën që e kanë banorët shqiptarë të së njëjtës anë. Ky është veprim që i ka hije vetëm një kryetari siç është ai 24-karatësh i Gostivarit. Prandaj, Lëvizjes BESA – Gostivar e pyet kryetarin Bejta dhe BDI-në e tij se deri kur do të vazhdojë diskriminimi i vendbanimeve shqiptare, përderisa pala tjetër ndërton me qindra e mijëra kilometra rrugë në vendbanimet me shumicë maqedonase? Dhe, deri kur vendbanimet shqiptare do të vazhdojnë t’u ngjajnë getove, përderisa vendbanimet maqedonase ditë e më shumë u ngjajnë qendrave më të urbanizuara evropiane?

Duke parë hallin e këtyre banorëve, Lëvizja BESA – Gostivar kërkon nga kryetari i Komunës, i cili njëherësh është edhe nënkryetar i Bashkimit Demokratik për Integrim, që të ndërmarrë masa për rregullimin e rrugës në fjalë, në mënyrë që t’u japë fund peripecive të këtyre banorëve, duke u mundësuar atyre lëvizjen e lirë.

Me këtë rast ua kujtojmë qytetarëve të Gostivarit dhe të gjithë shqiptarëve të tjerë se ata që nuk e mbajnë fjalën e meritojnë dënimin e popullit.

Ndërkaq për gjendjen e kësaj rruge, e cila më shumë i ngjan një dhiareje, me asfalt thuajse krejtësisht të dëmtuar, më shumë se çdo fjalë, flasin pamjet në vijim.