Maqedonia gjatë këtij viti do të harxhojë 2.7 përqind më shumë energji finale se vitin e kaluar, parashikon Bilanci energjetik për vitin 2018. Pjesëmarrje më të madhe në energjinë e harxhuar do të kenë produktet e naftës me 51.5 përqind, me ç’rast do të pasojë energjia elektrike me 28, biomasa me 10.5 dhe thëngjili me 5.3 përqind, përcjell Fol.
Siç u theksua në seancën e Asociacionit Energjetik të Maqedonisë (AEM) në të cilën u shqyrtua bilanci energjetik, 39 përqind të konsumit të përgjithshëm të energjisë finale do ta absorbojë komunikacioni, 27 përqind industria, 26 përqind amvisëritë, 5 përqind sektori komercial dhe ai shërbyes dhe 1 për qind bujqësia.
Prodhimtaria e energjisë elektrike parashihet të jetë 5.766 gigavat orë, ose për tre për qind më shumë se në vitin 2017.
Nevojat e parapara të energjisë për vitin 2018 janë për 2 për qind më të ulëta në raport me vitin 2017. Në krahasim me vitin e kaluar rritje më të madhe vërehet tek gazi natyror prej 14 për qind, si rezultat i paralajmërimeve për prodhimin e rritur të “TE-TO”.
Në vitin 2018 parashihet produktet e naftës të marrin pjesë me 39 për qind të konsumit, thëngjillit me 31 për qind, biomasa me 8, gazi natyror me 9, hidroenergjia me 4, ndërsa e erës, ajo gjeotermale, biogazi dhe energjia solare me mbi zero. Importi neto i energjisë elektrike do të merr pjesë me 8 për qind.
Në vitin 2018 është paraparë prodhimi i 2.026 teraxhulëve energji termike që është më i ulët se konsumi në vitin 2017.
Bilanci energjetik është dokument planor indikativc në të cilin paraqiten nevojat e sasive të përgjithshme të energjisë dhe të llojeve të caktuara të energjisë në vend dhe mundësitë për sigurimin e tyre me prodhimin e kapaciteteve vendore dhe të importit. /Fol/
