Kompania finlandeze HMD Global ka bërë një paraqitje të jashtëzakoshme në MWC 2018 (Kongresin Botëror të Celularëve), por pritet të ndodhin shumë gjëra të tjera të mira për fansat e Nokias.
Edhe pse Nokia 8 Sirocco është smartfoni i ri i avancuar i kompanisë, së paku dy telefona të rinj me teknologji të fundit do të lansohen deri në fund të këtij viti, transmeton Koha.net. Fjala është për Nokia 8 Pro dhe Nokia 9.
Edhe pse nuk dihet se çfarë emra do të përdorë HMD për këto dy telefona të rinj të avancuar, burimet e Phone Arena thonë se Nokia 9 do të jetë telefoni më i mirë. Do të vijë me ekran më të madh 5.7-inç, ndërsa Nokia 8 Pro thuhet se do të ketë ekran 5.5-inç. Specifikat tjera ende nuk dihen.
Sidoqoftë, njëra nga pikat kryesore të shitjes së Nokia 9 do të jetë kamera e shumëpërfolur me pesë lente, të cilën Nokia 8 Pro nuk do ta ketë. Po ashtu, thuhet se Nokia 9 do të jetë smartfoni i parë i HMD-së me skaner për gishtërinj nën ekran. Të dy telefonat do të vijnë me procesor Snapdragon 845, por mund të vijnë me konfigurime të ndryshme të memorieve.
Sa i përket çmimit, Nokia 9 pritet të kushtojë pothuajse njëjtë sikurse smartfonët tjerë të avancuar të këtij viti, siç është Samsung Galaxy S9. Por, Nokia 8 Pro do të jetë shumë më i lirë.
Gjithashtu, raportohet se HMD Global planifikon ta zbulojë Nokia 8 Pro diku ka gushti, ndërsa Nokia 9 pritet të zbulohet së paku një muaj më vonë.
