Organizata Botërore e Meteorologjisë (WMO) thotë se niveli i dyoksidit të karbonit (CO2) në atmosferën e Tokës ka shënuar rritje rekorde në vitin 2016.
Në një raport të kësaj organizate të publikuar sot, theksohet se në këtë rritje ka ndikuar kombinimi i aktiviteteve njerëzore, siç janë intensifikimi i praktikave të agrikulturës, shkatërrimi i pyjeve, industrializimi dhe energjia e shfrytëzuar nga burimet e fosileve, dhe fenomeni i fuqishëm i motit, El Nino.
Rritja e shpejtë e niveleve të CO2 në atmosferë dhe gazrat e tjera të krijuar nga efekti serrë, kanë potencial për të iniciuar ndryshime të paprecedente në sistemet klimatike, që çojnë në “çrregullime të rënda ekologjike dhe ekonomike”, theksohet në raportin e Organizatës Botërore të Meteorologjisë.
