Banorët e fshatit Trebosh të Komunës së Zhelinës, janë ankuar sot se rruga që është duke u asfaltuar përmes fshatit, është jashtë të gjitha standardeve. Rruga me një gjatësi prej dy kilometrash, ka gjerësi prej 4.5 metra, që sipas banorëve është shumë e ngushtë. Ata kërkojnë që rruga së paku të zgjerohet edhe 50 centimetra shtesë, ose në të kundërtën, paralajmërojnë bllokimin e punimeve.
“Ne nuk jemi aspak te kënaqur me rrugën. Tepër e ngushtë është me e pa në vend nuk mund dy makina të kalojnë aty, ne patjetër të dalim dhe ta ndërpresim punën”.
“Kjo rrugë vërtetë është shumë e ngushtë, në fillim kreu i komunës kur erdhi tha që do jetë 5.5 metra kurse e shihni tash nuk mund dy vetura të kalojnë, do ketë fesat mes njerëzish. Do dalim gjithë bashkëfshatarët në protesta ose të gjejmë ndonjë zgjidhje tjetër”.
“Rruga patjetër të zgjerohet, është rajonale lidh disa fshatra. Ne kemi leshu tokat, arat tona për tu bë rruga më e gjerë tash na ngushtojnë rrugën se di pse”.
“Kjo nuk është rrugë e fshatit Trebosh por e pesë fshatrave dhe është e ngarkuar. Sa nuk ka fillu asfaltimi duhet të merren masa rruga të zgjerohet”.
Nga ana tjetër, kreu i komunës së Zhelinës Fatmir Izairi thotë se rruga është në përputhje me të gjitha standardet e nevojshme.
“Rruga zgjerohet bëhet katër metra e gjysmë me projektin ekzistues me anësoret 4.75 plus bankinat, pra rruga është e mjaftueshme, ndoshta tashi duket se është e ngushtë pa u vendos ende asfalti. Por nuk mendoj se ankohen banorët, por një grup prej tyre që duan ti hedhin hije projektit sepse në Trebosh veç këtij projekti që është rreth 330 000 euro edhe 400 000 euro të tjera janë në ankand dhe pritet faza e nënshkrimit pra mbi 800 000 euro projekte. Tek e fundit iu mbetet banorëve të Treboshit t`i marrin apo jo e drejtë e tyre është. Mundësitë për aplikim në agjencinë për përkrahje të zhvillimit rural ishin deri në 20 milion denar dhe ata e dinë projektin që prej kohësh dhe mundësitë reale për ndërrim të projektit nuk janë”, deklaroi kryetari i Zhelinës, Fatmir Izairi.
Rruga është e financuar me fonde nga Agjencia për Zhvillim rural, dhe vlera e saj arrin rreth 350 000 euro.
