Kreu i Kuvendit Talat Xhaferi në një prononcim për Alsat deklaroi se me kërkesën që deputetët e VMRO-DPMNE-së i dorëzuan atij për formimin e dhjetë grupeve parlamentare, de fakto, ata e njohin atë si kryeparlamentar. Xhaferi shtoi se formimi i dhjetë grupeve nga i njëjti koalicion zgjedhor nuk është praktikë e Kuvendit por është formë e duhur për të penguar punën në seanca, nëse ky është qëllimi i tyre. Ai madje shtoi se nuk ka mekanizma për të penguar obstruksionet e mundshme të tyre të cilat do të jenë në kuadër të Rregullores së Kuvendit.
