Sinani: Ali Ahmeti dhe Menduh Thaçi janë të dashuruar te njëri- tjetri

Përveç Lëvizjes BESA dhe PDSH-së, koalicionit qeveritar të qeverisë së Zaevit në Maqedoni do ti bashkohet edhe Lidhja e Romëve e drejtuar nga Amdi Bajram, deputet ky i shkëputur nga koalicioni i partisë më të madhe opozitare, VMRO-DPMNE-së.

Kuvendi qendror i PDSH-së pasi që ka bërë të ditur qëndrimin zyrtar për futjen në qeveri, ka zbuluar edhe dy emrat që do ta përfaqësojnë këtë parti si pjesë e ekzekutivit, edhe atë, për ministër për Investime të Huaja u përzgjodh Bardhyl Dauti, kurse për zv.ministër për Transport dhe Lidhje, Mitasin Beqiri.

Nga ana tjetër, Lëvizja BESA e Afrim Gashit, siç bëhet e ditur, në Qeveri do të drejtojë Ministrinë e Kulturës, ndërsa do ti takojnë edhe poste të zëvendësministrave dhe të ndërmarrjeve publike.

Deri tani, BESA nuk ngurron që të publikojë emrat e funksionarëve.

Ndërsa sa i përket Lidhjes së Romëve, kryeministri Zoran Zaev në një deklaratë për media sqaroi se kjo parti nuk do të ketë poste ministrore, mirëpo do të udhëheqin me resore tjera të rëndësishme.

Zgjerimi i koalicionit qeveritar ka hapur shumë polemika në opinion e më gjërë, kështu duke shtruar dilemën nëse Zaev dëshiron me çdo kusht të sigurojë stabilitet të shumicës parlamentare, madje duke mos zgjedh partnerët e koalicionit.

Sipas analistit politik Arsim Sinani kyçja e PDSH-së në Qeverinë e Zaevit është sinjal se kjo Qeveri është në rrugën e dështimit të saj.

 “E kam thënë publikisht po e ripërsëris: Ali Ahmeti dhe Menduh Thaçi janë të dashuruar te njëri- tjetri, nuk rrinë dot pa njëri- tjetrin. Marrja në koalicion e PDSH-së është nënçmim që u bëhet vullnetit të shqiptarëve dhe mesazh i keq për shpresat për reforma”, deklaroi për portalin tesheshi.com, Arsim Sinani.

Nga ana tjetër, inkuadrimi i BESËS së Afrim Gashit në qeveri, sipas Sinanit është një zgjidhje që koha do të tregon në çfarë strategjie po kalkulojnë, mirëpo të qenurit në një koalicion bashkë me Menduh Thaçin e komprometon dhe devalvon idenë e elektoratit të BESËS.

Ndërkaq, analisti politik Isa Spahiu cilëson se është e pafalshme që opozita shqiptare të përbëhet prej vetëm një parti ndërsa gjithë të tjerët të bëjnë gara cila e para do ti bashkohet Zaevit dhe qeverisë së tij.

“Nuk është që kyqja e Besës dhe PDSH-së do të sjell diçka të re në qeveri. Ky hap do të sjell efekt negativ pasiqë përveç partisë së Ziadin Selës, Aleancës për Shqiptarët, ne do të mbetemi pa opozitë përshkak se të gjithë të tjerët tentojnë të hynë në qeveri dhe ne nuk do mundemi të “luftojmë” për kauzën kombëtare apo shqiptare. Është e paarsyeshme që të gjithë partitë shqiptare të bëjnë garë se cila e para do ti bashkohet Zaevit dhe ata në këtë mënyrë zgjidhin çështje brendapartiake ndërsa ne nuk fitojmë asgjë”, vlerëson Spahiu.

Marrja në qeveri e Lidhjes së Romëve në krye me Amdi Bajramin, zgjoi reagimin e ashpër të njërës nga aktivistet më të flakta të Revolucionit Laraman, Simona Spirovska.

“Gjatë protestave të Revolucionit Laraman së bashku me LSDM-në për rrëzimin e regjimit të Gruevskit para dy viteve, Zoran Zaev na pyeti: “fëmijë si jeni, ne iu përgjigjëm, mirë”. Dëshiroj që edhe njëherë të na parashtroj të njëjtën pyetje dhe ti them se nuk jam aspak mirë, po ndjehem neveritshëm. Le t’më pyet pse, ti tregoj se po koalicionon me m… Amdi Bajram prej të cilit kanë vuajtur edhe grupi etnik të cilit ai vet i takon. I njëjti ia ka treguar Zaevit gishtin e mesëm”, shkruan e revoltuar në facebook, Simona Spirovska.

Poashtu, edhe analisti politik maqedonas, Petar Arsovski porositi kryeministrin Zoran Zaev që mos të zgjerojë koalicionin qeveritar për shkak të numrave, por rikonstruimi i qeverisë të shërbejë si lehtësim për tejkalimin e sfidave të reja.

“Rikonstruimi i qeverisë nuk duhet të shihet si një zgjidhje për koalicionim më të mirë, më funksional dhe konsolidim të pozitës, pasi që kryeministri është i vetëdijshëm që po afrohen sfida tjera të rëndësishme me të cilat do të duhet të përballohet”, deklaroi Petar Arsovski.

Kujtojmë se disa nga sfidat më të rëndësishme të Maqedonisë dhe kryeministrit Zaev janë zgjidhja e çështjes së emrit, reformat në gjyqësi, anëtarësimi në BE dhe NATO.

SHPËRNDAJE