Barcelona humbi një mundësi të mirë në Camp Nou për ta ngushtuar në vetëm tri pikë diferencën me Realin e Madridit. Shpërdorimi i disa rasteve të pastra para portës sidomos nga Messi e Neymar, rezultoi një vetvrasje për bluagranat, që u ndëshkuan në minutën e fundit të kohës së rregullt nga Sergio Ramos.
Në fakt, duke iu referuar statistikave të këtij sezoni dallohet qartë se “Camp Nou” po rezulton një fushë e “huaj” për formacionin e Luis Enriques. Në shatë ndeshje të La Ligas të luajtura në këtë impiant, Barca ka grumbulluar vetëm 12 pikë nga 21 të mundshme, ecuri kjo që i shkon përshtat një skuadre të Mesit të tabelës.
Në “Camp Nou” Barca ka mundur të troiumfojë vetëm ndaj tre kundërshtarëve, Betisit, Deportivo La Corunias dhe Granadas, ka humbur cuditërisht me Alavesin si dhe ka barazuar me Malagan e Atleticon e Madridit, e së fundmi ndaj Realit. Luis Enrique e përsëriti shpesh në konferencën për shtyp pas El Clasicos se ekipi i tij po lë shumë pikë në shtëpi, ndaj duhet të përmirësohet. Blaugranat i kanë dhënë kënaqësi publikut vendas në fitoret bindëse 6-2 me Betisin e 4-0 me Deportivon, ndërsa suksesi minimal me Granadan nuk i përmbushi pritshmëritë e tifozëve. Me 42% të pikëve të lënë në ndeshjet shtëpiale, Barcelona nuk është për titull, ndonëse diferenca prej gjatë pikësh me Realin është e rikuperueshme pas vetëm 14 javëve kampionat. Kjo ecuri negative në “Camp Nou” mund të shoqërohet edhe me sanksione ndaj klubit katalanas për sjellje homofobike të tifozëve vendas ndaj Cristiano Ronaldos. Gjatë El Clasicos, në disa raste portugezi u vu në shënjestër të të 98 mijë të pranishmëve, reagimi i të cilëve nëse interpretohet si e dënueshme nga zyrtarët e ndeshjet, do të shoqërohet me masë ndëshkimore nga komisionet juridike në Federatën Spanjolle të Futbollit.
