I dërguari special i Gjermanisë për Maqedoninë Johanes Hajndëll, në deklaratë të shkruar deri te mediat thotë se ka ardhur në Maqedoni që të njoftohet me situatën dhe potencon se koha është e shkurtër dhe se tani nevojitet përpjekje e përbashkët e të gjitha partive politike që të zbatohen reformat e nevojshme.
“Erdha që të njoftohem me situatën dhe së pari të dëgjoj. Bëhet fjalë për atë, procesi i cili është inicuar nga BE-ja dhe nga SHBA-ja të lind me sukses. Detyrën time e shoh në përkrahjen aktive të këtyre përpjekjeve. Zhvillimi ditëve të fundit sërish qartë tregon se koha është e shkurtër dhe tani nevojitet përpjekje e përbashkët nga të gjitha partitë politike që të zbatohen reformat e nevojshme që të vazhdohet rruga”, qëndron në deklaratën e Hajndëll, të liferuar nga Ambasada e Gjermanisë.
Hanjdëll, i cili qëndron për vizitë dyditëshe në Shkup, pasdite në MPJ ka takim me shefin e diplomacisë së Maqedonisë Nikolla Poposki.
Pastaj ai do të takohet me ambasadorët e vendeve-anëtare të BE-së dhe SHBA-së në Maqedoni, ndërsa më vonë pasdite dhe nesër do të bisedojë edhe me përfaqësuesit e partive nënshkruese të marrëveshjes së Përzhinës.
Hanjdëll kohë më parë ishte emëruar nga ana e ministrit gjerman të Punëve të Jashtme Frank Ualter Shtajnmajer për të dërguar special në Berlin i cili do të punojë së bashku me Bashkimin Evropian dhe SHBA-në dhe do të ndihmojë gjatë zgjidhjes së krizës në Maqedoni.
