Një avion luftarak rus është rrëzuar në Mesdhe pak minuta pasi u ngrit në fluturim nga aeroplanmbajtësja Admirali Kuznetsov që gjendet pranë brigjeve të Sirisë, ka bërë me dije sot Ministria e Brendshme ruse.
Tre avionë Mig29 u ngritën nga aeroplanmbajtësja e epokës sovjetike dhe fluturuan në drejtim të Sirisë, por një prej tyre, u kthye pas dhe u përpoq të kthehej në bordin e saj.
Mediat raportojnë se avioni u detyrua të kthehej për shkak të një defekti teknik dhe u përplas në Mesdhe, ndërsa piloti po përpiqej ta ulte në aeroplanmbajtëse.
Zyrtarë rusë raportuan se piloti u katapultua nga avioni në avari dhe pasi u shpëtua, u verifikua që nuk kishte asnjë dëmtim. Flota ruse i kërkoi të gjitha mjeteve lundruese në zonë që të qëndrojnë të paktën 5 milje detare larg vendit të rrëzimit, ndërsa kanë nisur hetimet për të zyrtarizuar shkakun e përplasjes.
Moska po përgatit bombardierët me rreze të gjatë veprimi Tu95 dhe Tu160 për sulmet e ardhshme në Siri.
