Kryetarja e Kuvendit të Kosovës, Vjosa Osmani ka reaguar ashpër pas akuzave të rënda që presidenti i vendit, Hashim Thaçi i bëri sonte, duke thënë se dikush nga familja e Osmanit i ka shërbyer Serbisë.
Osmani ka thënë se “ky njeri mbetet faqja e zezë e vendit tonë”, dhe kjo sipas saj do të vazhdojë të mbetet kështu, derisa populli i Kosovës t’ia tregojë secilit vendin përmes votës.
Kryetarja e Kuvendit ka shkruar në Facebook, se babai i saj e ka njohur për komandant suprem ish-presidentin, Ibrahim Rugova, kurse Thaçi po e shpallë tradhtare familjen e saj, ashtu siç e shpallte dikur Rugovën me komunikatat e tij gjatë viteve të ’90-ta.
“Sonte, gjarpri paska provuar të kafshojë nderin e familjes sime. Babai im e ka njohur për Komandant suprem Dr.Ibrahim Rugovën. Me gjasë, prandaj, Thaçi po e shpallë familjen time tradhtare, njëjtë siç e shpallte Rugovën me komunikatat e tij të 90-tës e tutje. T’i shërbesh vendit tënd duke e njohur Rugovën si prijës, sipas Thaçit qenka sikur t’i shërbesh Serbisë. Shpallja e kundërshtarëve politik si bashkëpunëtorë të Serbisë i ka paraprirë gjithnjë sulmeve fizike e eliminimeve. E njëjta logjikë, si duket, po synohet të instalohet tash për të arsyetuar sulme të paramenduara e parapërgatitura”, shkruan Osmani.
Ajo thotë tutje se në historinë e Lidhjes Demokratike të Kosovës, nuk do të ketë njollë më të zezë se sa zgjedhja e Thaçit për President të vendit.
“Lidhja Demokratike e Kosovës do të jetë sërish lidhje me popullin vetëm në ditën kur kërkon falje të sinqertë e përkulet para qytetarëve për këtë gabim i cili po e qon vendin tonë drejt humnerës. Por ky vend nuk i është nënshtruar as regjimeve gjenocidale. Nuk do të dorëzohet as para shpifësve në rolin e Presidentit. E deri atëherë, kur ky popull do ja tregojë vendin secilit, me votë, ky njeri mbetet faqja më e zezë e vendit tonë”, shkruan Osmani.
Ky reagim vjen pasi presidenti i vendit, Hashim Thaçi, ka hedhur akuza të rënda ndaj Osmanit, duke thënë që dikush nga familja e saj i ka shërbyer Serbisë.
“Projektet e mia kanë qenë gjithmonë për t’u përballur me Serbinë dhe kështu kemi fituar lirinë dhe pavarësinë. Nëse dikush nga Osmani i ka shërbyer Serbisë në atë kohë, unë i kam luftuar ata”.
“Po të isha në vend të Osmanit do të isha djersitur. Do të flas shumëçka nëse ajo vazhdon të shpifë”, ka thënë Thaçi në Rubikon në Klan Kosova.
